周慧敏黑洞錄音 基仔搞足四晚虛脫
周慧敏（Vivian）事隔17年再出專輯，好友古巨基臨上機前也趕來祝賀，今次兼任歌曲監製的基仔大爆Vivian喜歡自製「黑洞」錄音的怪癖。二人最後花四晚時間完成新歌，古監製更攰到嘴唇變白，Vivian笑言要贈人參補身。
周慧敏今天推出加盟英皇後首張福音碟，她昨出席假佐敦莎莎旗艦店舉行的「周慧敏《HIM》新碟發布會」時，獲好友兼歌曲監製古巨基神秘現身撐場。雖然基仔趕上機離港，但仍抽空支持，並送上印有V字的心形盆景當賀禮。
基仔笑言錄音時不忘擺監製款，又爆Vivian的怪癖，就是將錄音室變成「黑洞」：「佢錄音時唔會畀我望到，要拎毛氈擋住塊玻璃。」Vivian表示：「每個人錄音都有小怪癖，我一定要着平底鞋，又唔想人見到我，因為錄音時情緒會Over，七情上面！」
讚古太活躍
二人共花了四晚完成新歌，問基仔是否惡監製？Vivian笑言：「基仔好有氣場，但冇力惡，佢做到口唇都白晒，大家又唔出聲，我司機以為我哋鬧咗交。不過佢係一支強心針，我太耐冇做大碟，以前錄音嘅固有模式要放低，有個熟嘅人帶住起步，好有安全感。」她又笑言若下次再有機會合作，會送人參給基仔補身。
對於本報早前踢爆古太Lorraine孕味濃，傳基仔快做老竇，Vivian不願置評表示：「唔敢八卦，唔想增添佢麻煩。（見過Lorraine？）有見到，但冇留意佢身形，總之佢依家活如脫兔。」據知Lorraine昨亦在場，但避見傳媒。
文：音樂組