翠如晒幸福愛 香香隨緣
藝人黃翠如、岑麗香（香香）在錄影無綫節目《明星愛廚房》期間，捧出蛋糕為麥長青慶生。而黃翠如提到蕭正楠時即甜爆，但問到他是否家人時，翠如口窒窒回應：「未……唔係……唔係屋企人。」香香亦在旁送祝福，並謂自己拍拖隨緣，冇白馬王子亦開心。
無綫節目《明星愛廚房》昨日在酒店進行拍攝，有份參與的黃翠如、岑麗香、黃智雯和簡慕華，原來夾定給麥長青（麥包）送驚喜，為他慶祝生日。當記者為眾人拍合照時，香香鬼馬地閃開扮補妝，原來秘密取蛋糕，更大叫：「麥包！着火呀！」弄得麥包又驚又喜，氣氛熱鬧。
訪問時翠如坦言男友蕭正楠三月生日，不過就未開始準備禮物，且屆時可能要工作，而今年的聖誕就會與家人開派對，更自爆若家姐細妹帶上另一半的話她亦會攜眷出席，問是否已視蕭正楠為家人？翠如即口窒窒謂：「未……唔係……唔係屋企人，（送咩禮物？）今日學煮飯囉，之前整過西班牙海鮮炒飯，其實佢煮嘢叻過我！（你整咩？）煎過蛋，佢表情麻麻，我哋少煮嘢食！」在旁的香香亦被翠如的甜蜜「晒親」，雖然她亦戥翠如開心，不過自己拍拖就隨緣，即使冇白馬王子亦可以很開心。
黃智雯撚手咖喱雞
同場的黃智雯就直認「煮嘢有一手」，平日會收藏菜譜的她原來師承媽媽，更自認最拿手煮青咖喱雞與節瓜蝦米粉絲，果然入得廚房！提到她失落台慶獎項，她就表示並無失望，解釋謂今年自己的作品只有劇集《飛虎Ⅱ》，問她在劇中犧牲大？她謂：「男仔仲辛苦啦，希望套劇有好成績。」
文：影視組