謝偉倫賺少啲帶挈Band友搵銀
新人歌手謝偉倫（Alan）前晚現身旺角唱片舖舉行新碟《醒覺》簽唱會，擁有兩年街頭演唱經驗的Alan即席演唱《醒覺》、《風不息》等四首歌曲，得到觀眾熱烈支持的Alan未夠喉，追加演繹新歌《不信命》，儼如辦試聽音樂會。
Alan笑言在室內開騷與過去演唱最大分別就是「有瓦遮頭」，不用再風吹雨打，雖然場地轉移，但粉絲心不變，部分捧場者是舊擁躉。談到Live中只有一個結他手，Alan直言以前有夾Band的夥伴，但未有一同入行：「其實大家都好有潛質，但因為做音樂好多擔憂，我都驚帶挈唔到佢哋，但如果有啲騷有錢嘅，都好想將佢哋介紹畀大家。」他亦表示不介意收入被分薄。
父創作浪子歌
講到新碟中的《風不息》是其父親創作，Alan表示每一次聽都會有很深感受，又笑說爸爸的版本更有浪子feel，自己還需要多點經歷。問到同是「Rock友」的爸爸對新碟的評價？Alan笑言：「Daddy好鍾意，碟入面嗰六首歌仲不斷聽，佢都讚我OK。」
文：音樂組