張智霖避同台 阿佘風騷開香檳
佘詩曼（阿佘）前晚以大熱姿態獲封雙料視后，無綫本一度安排張智霖（Chilam）頒獎給阿佘，藉此製造話題，惟Chilam不欲緋聞被擺上枱，最終改頒視帝獎。不過獨攬兩獎的阿佘仍一臉風騷，除了媽咪及一班好姊妹驚現錄影廠，更獲30名粉絲漏夜於電視城外齊開香檳慶祝，令她感動得眼泛淚光，阿佘直言感覺仍在夢中。而前晚頒獎禮最高收視點為宣布視后一刻，達34點收視，成為本年度綜藝節目最高收視點。
無綫《萬千星輝頒獎典禮2014》前晚圓滿舉行，賽前視后大熱佘詩曼不負眾望，憑《使徒行者》連掃「最佳女主角」及「最受歡迎電視女角色」成雙料視后。不過在視后的頒獎嘉賓方面卻發生一段小插曲，皆因阿佘與Chilam這段陳年緋聞，近日隨着合作《十月初五的月光》電影版又再被炒起，有傳無綫曾食住條水邀請Chilam頒發視后獎，變相頒發獎座給昔日緋聞女友阿佘，Chilam為免緋聞被擺上枱而推卻，最終改頒發視帝獎。昨日Chilam接受本報電話訪問時卻否認傳聞，指本月初獲經理人透過短訊通知任視帝頒獎嘉賓，更笑謂：「如果安排頒視后都冇問題，聽日（今日）仲會一齊出席剪綵活動，（有冇當面祝福？）未有機會，但之後一定會當面恭喜佢。」
220萬觀眾見證
勇奪雙料視后的阿佘，除成為首位兩次奪雙料視后的女藝員外，《使》劇亦於頒獎禮奪5獎成為大贏家，可喜可賀！無綫昨日亦公布頒獎禮收視，平均收視為31點，約二百萬觀眾，而最高為34點，超過二百二十萬觀眾收看，乃宣布阿佘獲視后獎一刻，頒獎禮更成為本年度綜藝節目最高收視點，無綫更將於下周二舉行慶功宴。
前晚於頒獎禮後受訪時，談及媽咪及一班好姊妹包括周家蔚、湯盈盈等現身錄影廠送驚喜，阿佘坦言感動到喊：「完全唔知佢哋會嚟，一見到就爆喊，因為佢哋連仔都唔湊，連我媽咪都好好戲，初時叫經理人幫我攞飛，點知佢話唔去，我覺得好麻煩，但原來係個驚喜。（做咗五料視后喎！）我依家仲喺夢入面未醒，除咗自己個名外咩都聽唔到，要回一回魂先。（今晚瞓唔瞓得着？）一定笑住瞓，終於可以放鬆心情。（點獎勵自己？）仲獎？我已經好多個獎喇，我今晚要攬住佢欣賞吓先。」對於《使》劇成大贏家，更獲「最佳劇集」，阿佘指甚為興奮，提到鍾景輝宣布一刻指獲獎劇集是三個字，阿佘謂：「其實當時呆咗，所以我好想睇番playback，King Sir好得意，我見到敏之同美儀好似呆咗。（有指會原班人馬開續集？）等公司安排，開嘅話我會接，（冇林峯囉？）可能佢肯拍呢。」
粉絲全天候眼濕濕
阿佘與眾得獎藝人拍攝官方刊物，至凌晨一時多才完成，30多名粉絲於電視城門外守候偶像，一見阿佘即興奮歡呼及開香檳慶祝，令阿佘感動得眼泛淚光，並向企足全日的粉絲高呼：「我愛你哋呀！」之後阿佘便急急腳離開，笑指要趕返屋企吃媽咪愛心消夜。而昨日阿佘對於宣布視后一刻成最高收視，她謂：「好開心，慶祝活動一定出席，今次有一半係全民投票，有咁多觀眾鍾意特別開心。」
至於《使》劇監製文偉鴻就笑指對賽果喜出望外，雖然林峯未能獲視帝，但早已是其心中的視帝，更指正積極研究為劇集添食。同劇的陳敏之則對該劇男主角林峯缺席感可惜，她謂：「會盡量搵方法將呢個訊息話畀佢聽，因為佢喺呢套劇好大功勞，希望原班人馬或者用唔同故事方式拍新劇啦。」
文：影視組