沈震軒 陳凱琳全面躍進
今屆「飛躍進步男、女藝員」候選名單中的沈震軒與陳凱琳，前者因為易角而得以演出《使徒行者》中連浩勤一角，備受好評；後者曾挾17萬觀眾支持成為港姐冠軍，在處女劇《名門暗戰》中備受觀眾愛護，兩人能否繼續在領獎台上再領風騷？
新一代型男沈震軒（Sammy）憑《使徒行者》及《大藥坊》角逐今屆台慶「飛躍進步男藝員」獎項，他笑言是一次精神分裂的經歷，他說：「Kobe（《使》劇連浩勤）係我拍完監製文偉鴻《My盛Lady》後再次合作，佢令我學咗好多嘢。我都好鍾意《大藥坊》個奸角魏俊，佢嘅奸係深層，唔係奸在表面，最後變成喪心病狂，係好爆嘅角色。兩個劇拍嘅時候都係差唔多時間，我好似分裂咗咁。（有信心攞獎？）平常心，五十五十。最大對手係張繼聰，亦忠亦奸，樣樣都做得好，我睇好佢。」
拍劇斷手 錯有錯着
Sammy於《使》劇中的付出絕對不少，他說：「我拍單車捉賊嗰場戲整斷手，係我入行以來最辛苦，每晚靜落嚟都會好忟，點解會受傷？好彩錯有錯着，傷咗隻手好似幫咗個角色，令呢個臥底更有立體感。我原本唔係演呢個角色（原角色葉兆良，因森美辭演連浩勤一角，遂由他頂上），真係好多謝監製同編劇，為我將角色做咗啲修改。但後尾又斷埋手，當時有擔心過，可能係我有史以來最差演出，好在觀眾反應好好，諗番都幾刻骨銘心！」
資歷最淺 來勢洶洶
同樣感到刻骨銘心的還有陳凱琳，去年在17萬觀眾投票支持下成為港姐冠軍，一年之間做大騷司儀，又主持飲食節目《搵食飯團》，於處女劇《名門暗戰》演出蔣勵一角，亦頗受觀眾愛護，「飛躍進步」有目共睹。雖然她在候選者中資歷最淺，但來勢洶洶，大有機會以「新人王」姿態贏得獎項。
正身在橫店拍攝重頭劇《張保仔》的陳凱琳謙稱：「第一套劇有提名算係超額完成，自己覺得頒獎禮係好開心，好似台慶咁，本來都好希望感受吓頒獎禮氣氛，但依家喺橫店拍緊劇，遲啲要去無錫繼續拍，今年頒獎禮返唔到嚟，希望下次有機會參加，同大家玩番一晚！」
文：影視組
攝：秦健輝、劉斌
服裝：Caramel
場地：Sky City Nine Eagles Golf Course