楊怡爭視后 抗佘唔投降

無綫員工聯歡晚宴昨晚繼續於電視城舉行，筵開170多圍、合共1,800名員工出席，楊怡、李詩韻、葉翠翠、莊思敏、吳若希，王浩信，黃智賢及應屆港姐等也有現身，無綫總經理李寶安即席宣布，今年員工的年終花紅平均每人約一個半月，寄望眾人同甘共苦，再創佳績，台下員工聞言掌聲如雷。

唔撐羅仲謙攞視帝

憑劇集《守業者》角逐視后的楊怡，對於其餘花旦對視后獎均投晒降，問阿怡此行是拉票還是投降？她笑謂：「一陣要入廠，都拉唔切，我都支持阿佘，佢真係呼聲高，但我都唔係投降，到時着靚啲陪坐囉。（今年視后獎似一面倒？）都唔係，阿佘今年表現的確好標青，個劇同角色都好，係好事，唔使年年都你鬥我、我鬥你。」

李詩韻坦言入到五強已經滿足。

許紹雄、羅蘭和黃智賢等藝員齊齊碰杯。

談到男友羅仲謙亦有份角逐視帝，但阿怡直言會投票給郭晉安：「咁佢（羅仲謙）知我撐佢，其實入圍都好開心，繼續努力啦！（行政主席梁乃鵬話公司未來方向係向內地發展）係好事，公司有優勢，我哋經理人合約又唔使自己出頭，大台有保障，出去唔驚畀人蝦同收唔到錢。」

李詩韻五強已心足

第二度角逐視后的李詩韻亦指阿佘氣勢太強，故對獎項不敢多想。有否覺得視后冇得爭？她說：「都唔係，演技個個都好，阿佘就係天時地理人和，套劇爆，角色又好，好難同佢爭。（你目標係咪攞視后？）今年想入top 5，仲有5年約滿，希望約滿前攞到啦。」林師傑則否認與人鬥車之說，故不擔心被警方追究，但自言沒觀眾緣，承諾會努力洗底。

此外，無綫總經理李寶安在台上發言定軍心，並解釋收視點計算方法，揶揄港視收視差，他說：「有24點得來不易，等於160萬人睇足一個鐘，好似香港電視上星期黃金時段，一個鐘得1點收視。其實新聞部呢段時間都大壓力，正、反佔中有壓力，證明新聞冇偏幫，聽聞星期四會清場，請各同事小心。」

文：影視組