阿倫開騷keep fat鞭鞭有力
「樂壇校長」譚詠麟將於農曆新年舉行慶祝入行40年演唱會，在記者會上報喜指個唱首天優先訂票1小時已創「千萬票房」紀錄，揚言不減磅的阿倫有心有力，主辦商送上具雙重「作用」的馬鞭贈興，令見慣大場面的他也嘩嘩聲話大有機會「加場」。
譚詠麟（阿倫）昨日穿上禮服為於明年2月13至20日假紅館舉行一連8場《譚詠麟銀河歲月40載演唱會2015》舉行記者會，好友鄭裕玲擔任司儀，阿倫跟之前在維也納合作過的管弦樂團演繹了《忘不了您》及《愛念》兩首經典歌，為個唱作預演。
預告加場
贊助商及主辦單位送上寫着「音樂傳宇宙」的牌匾及馬鞭，阿倫看見馬鞭時，笑說：「嘩！呢啲嘢我用唔着喎！」主辦單位解釋贈策騎的馬鞭有兩個意思，指阿倫帶給人正能量，望他可以鞭策新人之餘，亦鞭策他回復當年的fit爆身材。問到有否好好鞭策自己的體重？阿倫表示沒訂下減磅目標：「太瘦孭唔起件衫！」他覺得在溫拿時代身形太奀似難民。
談及唱片公司不惜工本為他開記者會，阿倫講笑說：「我就話佢冇得翻本！」他謂先把這八場的門票賣出再作打算，問有否信心加場？他說：「都走唔甩o架喇！」還公告謂：「優先訂票反應好歷史性，頭一個鐘有八位數字票房。」
排唔切舞
阿倫透露個唱有管弦樂團助陣，至於個唱嘉賓全是他合作多次的舊友，溫拿會度期演出，是否有曾志偉？他笑說：「佢會嚟睇囉！（怕佢喺台上搞事？）我個演唱會好嚴肅！」至於兒子譚曉風學業為重，沒年假故未能捧場。而演唱會的內容已籌備完成，他謂這次亦會有管弦樂隊助陣，問到會否有熱舞？他說：「會有dancer跳，自己都會有幾個step配合番啲歌，但大跳就唔會，同埋都排唔切喇！」
文：音樂組