蕭正楠彈冇煮見逼翠如洗鑊

蕭正楠笑女友黃翠如廚藝差，曾吃對方煎唔熟的牛扒。

蕭正楠（Edwin）、黎耀祥及陳智燊昨日到尖沙咀，為岑麗香及麥長青主持的無綫節目《明星愛廚房》進行錄影。Edwin自爆經常化身住家男，為「大食」女友黃翠如親自下廚。他說：「佢食量大過我，又食極唔肥。但我覺得佢偏瘦，所以都會煮多啲分量，逼佢食多啲。（佢成日去你度食飯？）係，我會煮飯。」

香香賢良「食」得

問Edwin有否傳授廚技給女友？他即取笑對方比較適合洗鑊：「佢負責洗鑊好啲，聽佢語氣就知佢唔肯定煮緊咩。佢肯煮一、兩道菜，我都會開心。」他曾建議女友上烹飪班，更品嘗過對方炮製的生牛扒：「佢煎牛扒畀我。（好食？）唔係重點，（放得入口？）生咗少少。」孝順的Edwin又稱因媽媽戒食牛肉，特意學煮花膠等養顏菜式。

黃翠如（資料圖片）	香香坦言會加分給識煮餸的男士。	眾人於節目中分享烹飪心得。

廚藝了得的祥仔讚香香賢良「食」得：「我教佢用南乳煮餸，佢好聰明，直頭賢良『食』得。」問香香是否喜歡廚藝高超的男士？她笑指：「唔止識煮，煮完洗埋碗就最好，不過一齊洗碗都好浪漫。」即被身旁的祥仔取笑似乎需要找工人多於男友。祥仔透露為了遷就無綫頒獎禮及劇集《名門暗戰》大結局的播出時間，會提早與家人到日本北海道旅行。

文：影視組