霆鋒談菲冧笑 筍盤築愛巢

謝霆鋒昨日出席英皇集團（國際）有限公司最新樓盤、「維港峰」Upton委任項目代言人儀式及新聞發布會，活動安排在戲院內進行，現場率先播放出霆鋒的樓盤廣告，他在片中穿上鴛鴦袖西裝，手執權杖，最後一幕更在水中起飛腳踢到水花四濺，Chok到爆！

其後身穿啡色西裝褸的霆鋒現身主持儀式，他透露今次是首次為樓盤擔任代言人，大讚公司新盤間隔好，而且配備高品質的廚具，隨即被司儀大讚霆鋒同樣是絕世「筍盤」。出名是「煮」家男的霆鋒坦言理想中的Dream House會以廚房行先：「如果有景就最好，有啲最高嗰層有游泳池添，不過我最想都係個廚房喺我未搞之前，已經好齊全，可能我會想廚房比睡房更加舒適。」

謝霆鋒講起王菲即甜笑。	「筍盤」謝霆鋒chok爆拍樓盤廣告。	王菲與「煮」家男謝霆鋒復合，大有口福。（資料圖片）

考慮買樓

提到老闆可有送單位做酬勞？霆鋒笑言：「要問吓楊生（楊政龍）。（考慮買維港峰？）有考慮o架！」至於問到單位填誰人的名字時，霆鋒邊笑邊口窒窒說：「未呀，都未入去睇，都係要問番楊生。」有記者提議他與王菲在香港築愛巢，霆鋒一聽到王菲就甜絲絲微笑說：「哎吔！唔答呢啲嘢啦！」

對於胞妹謝婷婷爆料指王菲將來港過聖誕，霆鋒表示：「佢唔係呀，唔知呀，我過幾日飛去葡萄牙拍食油廣告，唔清楚點過。（一齊交換禮物？）唔答啦！」婷婷與戴尚安甩拖，霆鋒透露十日前在新加坡與婷婷見面，問到可有安慰？他說：「咁大個人，自己搞啦，我哋有傾偈，不過傾公事多。（想簽埋佢？）冇資格，我邊有資格。」

文：音樂組