張智霖（Chilam）與太太袁詠儀（靚靚）昨日現身韓國首爾，寓拍拖於工作，拍攝內地真人騷。適逢首爾下雨，甚有風度的Chilam為老婆撐起雨傘，靚靚則小鳥依人捉實老公臂彎，風雨同路，畫面溫馨！
三對明星夫婦，包括張智霖和袁詠儀、田亮和葉一茜、何潔和赫子銘，連同韓國組合Super Junior成員金希澈，昨日現身韓國首爾街頭，拍攝浙江電視台夫妻檔真人騷節目《一路上有你》，所到之處吸引不少韓國人及遊客駐足觀看。
穿黑色羽絨褸、戴墨鏡的Chilam，與靚靚漫步街頭，被不少遊客認出，Chilam除揮手打招呼外，又與女fans合照，有fans以普通話說：「太喜歡了！」靚靚之後又倚在Chilam膊頭，與另外兩對明星夫婦拍照留念。
Chilam與靚靚步行往拍攝場地期間，由於下着微雨，Chilam體貼為老婆撐起雨傘，以免靚靚被雨水濕身凍上加凍，靚靚則小鳥依人挽實老公臂彎，面上掛着冧到爆的甜蜜笑容，兩公婆風雨同路，畫面既溫馨又有愛。
Chilam早前在訪問中坦言：「好耐冇同阿靚一齊工作，亦都好耐冇一齊旅行，同埋我都未去過韓國，既然有機會寓工作同阿靚一齊去旅行，所以即刻應承！」對於外傳夫妻檔酬勞達3,600萬港元，「愛妻號」Chilam貫徹作風說：「酬勞滿意，但都係畀晒袁小姐o架啦！」
文：影視組