張家輝再開鬼戲 嫌煩唔預老婆

影帝張家輝與混血名模Jessica C.（JC）昨日出席商場舉辦的聖誕亮燈活動，以壓軸嘉賓身份到場的家輝，由馬車中神秘現身，更即場進行魔術表演，引來圍觀者歡呼。家輝透露近日忙於籌備自己執導的鬼片，故減少出席公開活動：「依家籌備緊劇本，之前套電影《盂蘭神功》未盡全力，所以今次偏向虎山行，再做得好啲。（主演埋？）自己會演出，但女主角未定，因為鬼片唔可能通過大陸送審，所以想搵本土香港女演員，係純港產片。」但他指不會找太太關詠荷演出，因兩人關係太親密，免得招惹麻煩！

聖誕親子外遊

問到今年聖誕節如何度過？家輝表示如不需工作，會盡量抽空陪家人，亦計劃到外地旅遊享受親子時間。他自言非常鍾情聖誕節，因小時候受西方文化影響：「我細個真係會掛對襪，因為家姐會送我禮物，到13歲先知冇聖誕老人，我家姐都點得我透。」對於鞏俐怒轟金馬獎不公平，拒絕再度參賽一事，身為「七料影帝」的家輝表示鞏俐非常有型，夠膽開聲表明立場，但就拒絕評論評選過程是否公平：「佢拍過唔少華人片亦拍過西片，係一個好資深嘅演員，獎項對佢嚟講係錦上添花，佢演技同經驗都係國際級水平。」

Jessica C.秘密練兵化身仙子跳舞。

張家輝表演魔術搞氣氛，籌拍新戲但不搵關詠荷演出。

JC冇監控男友

至於一身「性感仙子」造型亮相的JC，毫不吝惜露三吋事業線表演跳舞。她透露為今次表演已在家中練習數天，如無意外今年聖誕節會回美國度過：「將會過一個白色聖誕，未問男友會唔會一齊去，但想抽多啲時間畀屋企人。」有指她為防男友安志杰與前度謝婷婷翻撻，實行「同居政策」監察男友，JC對此否認，又稱絕不擔心：「好尊重佢同婷婷，大家會去對方屋企，但冇搬去佢屋企住。」又指情侶到雙方家中過夜非常普遍，過往從未曾與前男友居住在同一城市，自覺與安志杰已居住得非常近，故未有同居計劃。

文：名人組