李桂蘭親證婷婷冇黑面
昨日謝婷婷以紅色deep V裙出席首飾活動，自爆打算即場挑選聖誕禮物給哥哥女友王菲：「因為佢哋嘅手鈪可以刻名，幾有心思。（送畀王菲刻咩名？）未諗到，或者刻佢哋兩個人嘅名。（刻『阿嫂』？）都好喎，不過驚嚇死佢，其實我覺得佢個名好靚！」問到婷婷可會跟王菲在聖誕見面？她希望王菲可來港一同慶祝，因還未與她見過面。
剛宣布跟名媛李桂蘭兒子Sean分手的婷婷，被指有公主病致分手？婷婷淡然否認：「我自己獨立長大，唔會有公主病，我唔會唔開心，因為阿哥話做呢行食得鹹魚抵得渴；其實之前同Sean都有討論過點樣公布分手，Sean仲話不如開記者會，但我覺得唔使啩，最後決定喺網上講。（你對Sean媽咪黑面？）我同阿哥不嬲對長輩都有禮貌，我哋關係好好，我同Sean一齊嗰陣，見佢仲多過見自己三個屋企人，而且我哋好多嘢傾，仲成日一齊上網買嘢！」
而昨日李桂蘭亦出席手袋活動，同樣否認婷婷對她黑臉，更大讚她是個很sweet和細心的人。與李桂蘭同場的溫碧霞就透露聖誕會與家人到峇里旅行，因在當地買了屋，問她是否在外地投資房地產甚有研究？她說：「除咗投資，最重要係可以用番，遲啲都想喺紐約買屋，因為會送小朋友喺嗰邊讀書，到時可以陪佢。」
