王馨平打golf 夫妻培情

高爾夫球一向是名人熱愛的運動之一，鄭裕彤、李兆基等富豪亦愛不釋手，2001年下嫁金融才俊李家輝的王馨平（Linda），婚後過着少奶奶生活，變為名媛，之後技癢，再次玩票性質唱歌，閒時酷愛打高球。Linda透露自2003年開始學高球，一打就上癮，一星期打足七天，回家還刨高球書，她還自認比丈夫打得好：「因為我練習比佢多，而佢打波係為咗relax，我見有啲夫妻打波打到嗌晒交，我哋從來都唔會，反而有個共同嗜好係好難得，如果老婆唔打只陪老公打時坐一邊，都好悶！」

學習遇挫檢討態度

她又謂打高球另一好處是能讓她更了解自己：「打golf有好多因素喺裏面，好似天氣或個地形，因為每個場都唔同，係好難控制，有時自己好盡力打，但成績都唔理想會好嬲，甚至發脾氣，事後就會檢討，要學習遇到咩事都保持談笑風生嘅態度！」她又謂打高球多年，弄致身體筋骨受傷，現在靠做瑜伽來紓緩：「職業球員喺打波之前同之後做好多拉筋同按摩，我就用瑜伽嚟醫傷勢，做做吓上埋癮添！」她說打高球還讓她認識很多朋友，包括不同國籍如日本或韓國的女性朋友，她們還教導她如何護膚，她笑說：「日本人同韓國人都好注重保養，佢哋教我打波要化妝，咁好有效防曬。」

已有十年打高球經驗的王馨平，球技跟姿勢絕對有板有眼！

王馨平現在遇上高球不入洞，會笑說這個洞跟自己沒緣分，不會動氣。

趙式芝影響楊如芯

而Linda的好友趙式芝（GiGi）及「老婆」楊如芯（Sean）、名模陳祉妤亦是高球愛好者，閒時還會相約一齊打波，聯誼一番。而Sean受到GiGi影響打golf，只是打了短短的一年多，同樣瘋狂愛上，每星期最少打三次，嚟緊將會參加慈善golf比賽，她說：「同GiGi比，我依家都仲係初級組，但真係好好玩，以前鍾意打網球，依家基本上將運動嘅時間都放喺打golf。」

楊如芯（左）與陳祉妤十分老友，空閒時會相約打golf。

楊如芯（左起）、趙式芝及媽咪姚煒都是golf迷，可增進大家感情。

採訪：Ada Lam

攝影：司徒國榮

化妝：Kinny@MOD Makeup Academy

髮型：Jacky Leung@IL COLPO

場地：SKYCITY NINE EAGLE GOLF COURSE