黃宗澤覓120分老婆
無綫小生黃宗澤（Bosco）入行16年，由電視小生「升呢」做老闆，轉眼變成「鑽石王老五」，現時他以事業為重，愛情永遠擺最後。年初被爆與楊崢發展「姊弟戀」後卻火速分手的Bosco，坦言不抗拒有新戀情，媽咪還會幫眼揀新抱，又盼覓得120分好老婆。
怕女生為錢埋身
入行16載年中無休的Bosco，密密往返中港拍劇和電影，私下與友人在九龍城合資的蠔吧，開業不足一年已做得有聲有色，如此強勁的吸金能力，難怪近年有「鑽石王老五」之稱，旋即惹來緋聞纏身。
Bosco說：「我對『鑽石王老五』呢個稱呼冇乜感覺，大把男人『鑽石』過我啦，我只係有啲事業咁啫。因為自己有做生意，接觸層面多咗嘅時候，自然識嘅朋友都多咗，又唔一定淨係女仔嘅，其實邊有人得閒黐埋嚟呀，不過，我都驚啲女仔為錢而黐埋嚟，但其實個個都驚o架啦，好彩我仲未遇過。」
最憎賭博
搵錢當然重要，為的是心目中的dream house，Bosco說：「錢對每個人嚟講都緊要，睇你去到幾多先足夠，我就覺得起碼要買到間dream house，我想要間penthouse（樓頂公寓），但呢啲冇得強求，5000、6000萬樓就買唔起喇，我要2000幾呎就夠喇，但依家暫時未物色到。」
Bosco與友人合資的蠔吧搞得有聲有色，那麼平時又有否買股票？他說：「雖然之前我喺劇集飾演過金融才俊，但現實中我唔買股票，第一我唔識、唔熟炒股，第二做呢行冇時間理。其實我好憎賭錢，波、馬乜都唔會賭，最多湊熱鬧同朋友夾份玩吓，我寧願將啲錢食咗去，拎去買衫、買樓。我覺得三十幾歲人，就算投資蝕錢都有時間賺返嚟，加上飲食係我興趣，梗係趁後生有空閒錢去做啦，好過五、六十歲人輸咗返唔到轉頭，雖然辛苦但都圓咗自己夢想，依家盤生意都有賺些少啦。」
老婆要多功能
2012年，Bosco與胡杏兒的戀情告終，2014年初跟楊崢爆出「姊弟戀」，兩人更被撞破在西貢咀嘴，後傳「見光死」戀情瞬即玩完，更指Bosco媽不滿女方年紀大，搞到滿城風雨。當時Bosco更寧願缺席劇集宣傳，埋首在橫店拍劇賺人仔，難免令人懷疑他有心避傳媒。
Bosco即否認故意避開記者：「其實啲傳媒都對我幾好，返嚟冇乜再問我呢單嘢（崢澤戀），我覺得順其自然啦，從來冇強求過公開或收埋（戀情）。依家成日覺得30幾歲人，自己舒服咪得囉，我唔會刻意避開，又唔會高調到喺IFC頂樓大嗌，都係做其他人會做嘅嘢。正常30幾歲人搵個女朋友都冇乜問題，但我從來冇話定幾時結婚，媽咪又冇催婚，隨緣啦。」
愛情擺最後
那麼擇偶條件呢？Bosco媽有意見嗎？他說：「媽咪實會畀意見，但冇話規定乜類型，當然孝順係必備！因為我成日煮飯，所以女友唔使識煮嘢。最好好似《點金勝手》嘅胡定欣咁係一個120分嘅老婆，我諗係每個成功男人都想要，佢可以幫手打理公司、屋企，又奮不顧身、唔怕犧牲咁解決你嘅『蘇州屎』，呢啲老婆去邊度搵呀，我都希望有咁好嘅老婆。」
Bosco續說：「其實做呢行少啲時間陪親人、朋友就一定，但我一定會將家人朋友擺第一，因為友情同親情用錢都買唔到，但現階段會事業行先，咁都係為咗家庭環境好啲，愛情我永遠都擺喺最後，叻啲嘅應該同我啲朋友玩得埋，試過女友都埋怨我只顧朋友，不過我都好識做陪番佢補數。」
盼與嘉玲談情
型男當然要配索女，因此Bosco一向好有艷福，與無綫花旦胡杏兒、鍾嘉欣、徐子珊等合作無間，除了進軍內地拍劇外，近年他也逐漸跳進大銀幕，夥拍影帝曾志偉、袁詠儀和周秀娜等，可謂平步青雲。
問Bosco現階段最想跟哪個女明星合作？他說：「之前同鍾嘉欣、定欣、杏兒、子珊拍過晒，太熟喇，如果問我想同邊個合作……之前嘉玲姐姐（劉嘉玲）話過，如果返嚟無綫就想同我拍劇，影后喎，咁睇得起小弟，我當然都好想同嘉玲姐姐演對手戲啦！我好欣賞佢演技好好，同佢拍就一定會有壓力o架喇，如果劇本需要我哋扮情侶，我都OKo架。」現時不少藝人愛返內地賺人仔，對此Bosco說：「其實返內地拍戲係搵多啲，但喺香港就見到好多朋友，『針冇兩頭利』惟有取捨啦，當然揀戲會睇劇本先，起碼我鍾意同演得舒服先，如果唔係畀幾多錢都唔會去（內地）。」
後記：百無禁忌開籠雀
貴為大台一線小生的Bosco，私下一點架子也沒有，甚至與記者打成一片，有講有笑，非常down to earth。受訪當日，即使提及敏感字眼，如「姊弟戀」及「前度」楊崢等，Bosco一概大方笑住回應，如此識做，難怪深得一眾師奶和少女歡迎。親民、有米又靚仔的Bosco，被稱為「筍盤」也是當之無愧。
口述：黃宗澤
筆錄：影視組
攝：李廣成
服裝：MMM @ ITHK
髮型：Kel Fung @ HH hair.nail
化妝：Cyrus Lee