楊建平徐錦江 新戲交手惺惺相惜
影壇新人楊建平日前來港，與王宗堯、張建聲以及徐錦江等人合作新片《壹獄壹世界》，期間與徐錦江惺惺相惜。徐錦江得悉貴為冠軍拳手的楊建平轉戰娛圈，即豎起姆指大讚：「佢拍動作戲一定一流，身形好身手敏捷，好多好嘅條件集合於一身，OKo架。」
身為搏擊運動迷的徐錦江更表示：「嗰日我入到片場，見到一個好熟悉嘅身形，點解佢會喺度嘅？佢係我偶像，好犀利。我好鍾意睇佢運動（MMA），佢嗰種比賽充滿表演性，好完美，動作同埋身形好好，所以可以同佢一齊合作幾開心。」
年僅26歲的楊建平曾在武術界打滾12年，擁有世界自由搏擊錦標賽65公斤級冠軍及綜合格鬥（MMA）65公斤級金腰帶的彪炳戰績，最近更獲選為中國十大拳王之首。早前他獲電影公司老闆蕭定一相中，成功簽約轉戰藝壇參演新片，準備打出另一片天。