JC嘴角含春讚安志杰sweet
名模樂基兒與Jessica C.（JC）兩位新聞人物，前者剛與男友Denim分手，後者則與安志杰撻着蜜運中，昨日兩人齊齊現身，樂基兒淡然認單身拒與前夫黎明愛火重燃，JC則嘴角含春地說希望今次可覓得真愛。
樂基兒（Gaile）被本報踢爆與新西蘭籍男友Denim因性格不合分手，並離開峇里，昨日她現身活動時直認單身冇拖拍，對分手一事說：「感情事我不嬲唔答，過去咗就更唔會答，依家冇拍拖，專注工作。（分手後連instagram都刪除？）我一向唔鍾意社交網絡，初初覺得好有趣，後來成日要影相放上去，呢個唔係我風格。（已離開峇里？）我嗰度有物業，仲建築緊冇影響，都會返去滑水，仲有好多朋友喺嗰邊，不過依家係雨季，唔會返去。（會否再搵Denim？）唔知。」
已無聯絡
被問到前夫黎明知否她與男友分手，Gaile說二人已冇聯絡，不知他知不知亦沒有打算講。可有機會愛火重燃？她說：「唔答，咁舊嘅嘢，又咁耐嘅唔答。（隨時ready新戀情？）唔會住，好忙，依家專注搞珠寶生意要成日飛，但感情事never know。」問及會否將基地轉回香港，她說：「下年先，就嚟聖誕節，聖誕節我會喺美國陪家人，過完年先。」
新的開始
至於與安志杰（Andy）發展迅速的JC，提起安志杰時難掩春風滿面，大讚對方是smart guy：「我鍾意佢唔介意我外表同打扮，同佢一齊好開心，係好神奇嘅事，依家都係約會吓、睇吓戲。」由於她過往的戀情均是異地戀，分隔兩地拍拖好大壓力，難以維繫，今次可以說是新一頁開始！問到Andy有何吸引之處？JC說：「我哋撞埋一齊就擦出火花，希望搵到真愛，佢成日令到我笑，好sweet，又啟發我演戲。（認定係男朋友？）向呢個方向進行，佢唔喺我附近我就會好掛住佢。」他倆拍拖短短幾日，JC已到Andy屋企過夜真浪漫？JC尷尬又怕醜地說：「我有去佢屋企，佢好浪漫，我哋一齊睇戲。」
文：名人組