KillerSoap sing勢勁淚謝歌迷
KillerSoap的主音陳樂基（Rocky）自參與《中國好聲音》後人氣上升，更帶挈樂隊知名度，日前他們再度在九展舉行音樂會，六百張門票全部售罄，是銷情最好的一次，難怪Rocky全程High爆，面對歌迷的支持更不禁落淚！
樂隊KillerSoap日前三度在九龍灣國際展貿中心舉行音樂會，全場爆滿，心情靚爆的Rocky更站上台前的音箱演唱，全場歌迷亦舉手應援，反應熱烈。Rocky對於今次入場觀眾最多也激動表示：「以前試過有更多觀眾，但係同場有好多隊Band，今次我哋一隊KillerSoap已經搞掂你！」Encore期間Rocky及鼓手Gould拿起相機拍台下的歌迷，Gould更將其鼓棍拋向歌迷。
有名氣冇自由
他們完騷後接受訪問，對於這次入場人數最多，他們笑言每次都會幻想有很多歌迷撐場，Rocky亦坦言參加《中國好聲音》後知名度上升，但他呻多人認識後感覺少了自由：「開頭畀人認得會幾爽，但依家出街要頭耷耷。」他們特別感謝歌迷的投入讓他們很享受：「今次有好多第一次嚟聽或者接觸嘅人，舊嘅歌迷幫到好多，帶動大合唱等等，畀班新歌迷融合到。」
目標世界巡演
Rocky在台上更不禁掉下男兒淚：「男人老狗咁樣好醜，有時聽到難聽嘅嘢或者壓力，但面對人群又要好正面，所以當見到歌迷肯同我哋一齊唱嗰陣就忍唔住。」而曾舉辦兩次中國巡演的他們表示雖暫無計劃再次中國巡演，但決意將夢想擴展至世界巡演：「十年前希望搞中國巡演，十年後我哋成功咗，所以世界巡演呢個夢想唔係冇可能。」
文：音樂組
攝：司徒國榮