楊千嬅謝絕咪霸 開騷唔搵丁
楊千嬅在5年前的紅館演唱會上和當時的未婚夫丁子高合唱，兩年前又佗住囝囝為好友演唱會做嘉賓，今次終於到她再開個唱，不過千嬅一口拒絕「大小丁生」再度登台，拒讓「咪霸」丁子高聲震紅館。
相隔5年沒開演唱會的楊千嬅，昨日舉行記者會宣布明年一月尾在紅館舉行《六福珠寶呈獻楊千嬅Let's Begin世界巡迴演唱會2015》，由於反應熱烈，未開賣已宣布加場至共5場，2月初生日的千嬅明言想唱到她生日當天：「梗係希望，坐滿一場咪又加，個天畀幾多場就幾多場。」
有仔萬事足的她，連開演唱會也是為了囝囝Torres而做，好讓他長大後了解自己的工作，不過就拒讓囝囝上台：「綵排嗰陣上台行吓就得，真係開騷就好危險。」就連一向愛晒歌喉的丁子高也冇得出場：「大家都知佢鍾意唱歌，不如留番佢生日開場騷畀佢唱啦。叫佢上去我驚佢停唔到，平時同朋友唱卡拉OK佢要夾兩份錢，好似駐場歌手咁。」更大爆老公手汗勁：「我懷疑佢仲勁過古巨基，佢唱歌要用毛巾包住支咪，驚漏電呀！」
表演跳舞怕拗柴
雖然千嬅在《色惑》有突破性的狂野演出，不過她拒行性感，轉向舞蹈着手，請來郭富城排舞師排舞，卻又被老公取笑：「我好論盡，佢叫我應該先學行路，因為我成日跌親同拗柴。」那可會設計少一點舞台機關？她笑言：「總之佢郁我唔郁，我郁佢唔郁！」
文：音樂組