莊思敏馬場逢源 中西夾擊
藝人莊思敏早前與一班好友到馬場欣賞賽事，還包了廂房邊歎美食、邊小賭怡情。當日賭運不錯的她，亦有所斬獲。當她走出看台時，即惹來中外男士左右夾擊集郵。
莊思敏（Jacquelin）早前與妹妹莊思明、王子涵等一班好友，齊到沙田馬場出席莎莎婦女銀袋日活動。為能舒適地欣賞當日賽事，Jacquelin還特地包了一間廂房與好友邊品嘗美食，邊看電視直播賽事。而她亦表示有下小注賭賭運氣：「基本上我每年都會參與呢個盛事，感覺好有氣氛。大家都Dress up晒扮到好靚先嚟，同埋喺咁大型嘅賽事都會撞到好多朋友，可以乘機聚吓。咁啱呢度開咗間新餐廳，今次就同啲朋友嚟試下。」而Jacquelin走出看台時即惹來不少人上前集郵，當中一中一西兩名男士更左右夾攻她，她亦來者不拒。
專人畀貼士
Jacquelin透露每逢入馬場都會買馬：「房內直播所有賽事，每場賽事開跑之前仲會有專人入嚟畀貼士我哋，都OK準，已經中咗兩場。因為身邊好多人會畀貼士，我會忍唔住買，都係買十蚊廿蚊，最多一、二百蚊玩吓，所謂小賭怡情，同埋可以令自己投入啲。我會睇到好肉緊，輸咗都會搣飛。我覺得自己其實冇咩賭運。最叻嗰次係同朋友夾份爆大冷，二百蚊贏八千蚊。」
千禧年放行
而同行的王子涵透露，首次入馬場包廂則是在她11歲時：「嗰時係千禧年，馬會開放畀十八歲以下小朋友入場，我就跟爹哋媽咪一家人入嚟玩，好開心咁走嚟走去。」
文：名人組