李彩華30萬包父母 豪遊杜拜
女星李彩華（Rain）今天「11月11日光棍節」正日生日，踏入31歲芳華正茂的她，豪擲30萬請父母豪遊杜拜，獨欠一個男朋友的Rain發表光棍節生日宣言：「大家落力啲介紹男仔我識，成功咗，我一定醒封大利是！」
今天31歲生辰的李彩華（Rain），近年忙於在內地發展，有感之前一直瞓身工作，陪伴雙親的日子不多，遂豪擲30萬請父母豪遊杜拜，Rain租了兩間每晚房租各兩萬港元的帆船酒店房間外，又買了商務機位給父母，讓他們可安樂歎世界。豪請、豪玩、豪食、豪飲、豪住的Rain，此行使費雖然「乸脷」，但她貴為新一代小富婆，絲毫不覺肉赤，今時今日乜都有的Rain，反而因為獨欠一個男朋友，令個心赤赤痛。
打入30大網上代言人
31歲芳華正茂的Rain生於「光棍節」，她慨嘆：「今年生日有好大感受，以前經濟唔好，同人拍拖會做咗人哋嘅負累，到我依家經濟好，啲男仔又唔敢埋身。我好日都唔喺香港，一返香港，啲朋友即刻介紹好多男仔我識，次次都安排飯局，但都係遇唔啱，唉，做女仔真係好難！希望大家落力啲介紹男仔我識，成功咗，我一定醒封大利是！（小富婆大手筆覓好姻緣？）唔好咁講，我向大富翁進發。兩個人喺一齊最緊要內心滿足，價值觀相近。」
Rain名利雙收，更有新的演藝大計，她說：「我代言嘅品牌因為產品暢銷，我入選咗三十大網上代言人，同甄子丹齊名，呢三十個廣告之後會安排喺紐約播，我希望趁機衝出亞洲，邁向國際，做『女版宇宙最強』！」
髮型：Daniel Chou＠TO．KIO Hair｜Designing
文：影視組