黎耀祥靚湯滋潤 蓋鳴暉讚乖
「視帝」黎耀祥（祥仔）、蓋鳴暉（Joyce）、關寶慧等主演的舞台劇《星海留痕》，前晚在新光大劇院首演，祥仔自爆開金口獻唱，更與首次合作的Joyce擦出火花！在旁的Joyce聞言即讚祥仔好乖：「我未試過排咁耐，我同關寶慧排咗一個月！祥仔真係好乖，連出外景都會背熟劇本。」
關寶慧大感壓力
問到祥仔會否擔心首演「食螺絲」？他豪氣的表示信心十足，又稱演出前太太為他煲愛心湯水：「100%準備好！太太同囝囝都有嚟同我打氣。（太太煲靚湯侍候？）煲西洋菜湯潤吓喉咁囉。」
有份參演的關寶慧自爆有歌星好友撐場，令她倍感壓力：「李蕙敏、黎瑞恩、湯寶如都話嚟捧場，我唔知佢哋嚟邊場，佢哋秘密撐場我就冇咁大壓力。」
李居明爆有折頭
至於出品及製作人李居明就激讚祥仔歌喉勁，又指《星》舞台劇會成為長做長有的「戲寶」。問他是否今次重金邀得「視帝」祥仔演出？李居明自爆獲打折：「佢同Joyce都好畀面，有折頭！今次係最重手嘅投資，我簽支票都簽到驚。」而曾與祥仔合作的無綫新劇《名門暗戰》的藝員及阮兆祥、謝君豪等藝人更送上花牌祝賀演出成功。
文：影視組