Bob啃細細粒處kiss 捱義氣包養
林盛斌（Bob）和陳嘉佳（細細粒）的重口味終極長吻將於新劇曝光，女方聲稱的真實初吻被男方奪走，當阿Bob嘗完人家初吻卻玩踢爆，指對方純熟程度不似「處Kiss」，但他仍然負足男人應負責任，揚言若細細粒因咀嘴戲而冇拖拍會養足一世：「佢好易養！」
無綫劇《老表，你好hea！》中林盛斌（Bob）和陳嘉佳（細細粒）的重口味終極長吻是本星期的重點場面，由床頭錫到床尾的兩人挑戰電視尺度，更有機會打破周潤發和鄭裕玲在劇集《網中人》激吻兩分鐘經典場口的紀錄！
「強奪」細細粒初吻的Bob反指對方經驗老到不似第一次：「佢仲識就位，一Take過完成！（佢蝕大底？）兩邊都蝕底，我知道佢係初吻之後，就同佢講嗰幕出咗街之後幾年都冇人要嘅話，我就養佢！（計埋佢養五個女人？）佢依家減緊肥，細食咗好多，好易養。」至於會否怕觀眾嫌太重口味？劇中背脊布滿拔罐印的他笑謂：「我不嬲都喺啲節目行重口味路線，唔怕畀人話重口味。」而細細粒受訪時就坦言拍咀嘴戲前做足「安全措施」，既刷牙又漱口確保沒有異味。
王菀之恨蔣志光寫歌
同劇飾王菀之經理人的蔣志光演繹《相逢何必曾相識》後再次彈起，王菀之昨日到將軍澳出席簽唱會時表示：「我細細個就熟晒佢首歌，冇諗過自己把聲可以喺呢首經典歌出現，仲同兩個頂級唱作人前輩合作。」問會否支持蔣志光復出樂壇？她直言未覺對方離開過音樂，亦想他為自己度身寫曲詞。至於飾王菀之父親的胡楓前晚在慈雲山一個盆菜宴亦支持蔣志光繼續寫歌，更大讚對方甚有才華。
文：影視組