鄭嘉嘉周身沙 慳妹有計
歌手鄭嘉嘉日前到沙灘拍攝新歌MV，穿上長裙的她被安排落水中及趴在沙上取景，由於長裙黐滿幼沙，導演宣告報銷，慳妹的嘉嘉即表示帶回家清洗再着，她坦言不是價值問題：「環保啲。」
鄭嘉嘉今年四月轉投一間擁有三十年廣告音樂製作的公司，日前她為新國語歌《Miracle Love》到石澳拍攝MV，由於導演要捕捉日出時的美景，故凌晨四時就開始拍攝，嘉嘉直言為免「瞓過鐘」，前一晚不敢睡覺，她說：「唔夠膽瞓。（唔驚有黑眼圈？）又冇乜，反而水腫。」
殺出隻黑貓
嘉嘉透露當日凌晨三時就出發，化妝期間發生趣事，她說：「凌晨四點開始化妝，導演好好，搵到一個有燈嘅地方畀我化妝，點知化化吓突然跳出一隻黑貓，因為化妝師好驚貓，大叫時唔小心喺我面上劃咗一筆。」即被取笑「花面貓」，嘉嘉說：「化妝師好專業，都執到。」
內地谷宣傳
由於嘉嘉被導演安排落水及趴在沙上，搞到長裙濕透兼黐滿沙，縱然導演表示會報銷，但慳家的嘉嘉卻主動要求帶回家清洗，她說：「我係慳妹，唔覺得一定名牌先係好，最緊要着得舒服，其實洗乾淨都可以捐出去，環保啲嘛。」近日返內地宣傳歌曲的嘉嘉說：「四日宣傳，每日工作都由朝早排到夜晚，連食飯都喺車上。（辛苦？）都OK，唔辛苦點做好音樂。」
文：音樂組