孫慧雪花心思幸福DIY
對handmade飾物情有獨鍾的藝人孫慧雪，平日有鋪DIY癮，諗頭多多的她更受卡通片啟發，將乾花製成獨一無二的乾花首飾：「朋友知道我好鍾意整嘢，成日都會叫我幫手諗吓整啲咩飾物，咁我本身好鍾意睇《美女與野獸》，王子為咗保護朵玫瑰花，就用個玻璃罩住佢，啟發咗我將屋企啲乾花整成戒指。」
本來只打算與朋友開心share作品的阿雪，意外大受網友歡迎，近日更榮升老闆出售自家飾物，惟她笑言只在追求滿足感：「我冇當佢係生意去睇，純粹當係一件自己鍾意做嘅事。因為買花、曬花、到整飾物都係自己包辦，所以每次有人讚好靚，都好有成功感，希望透過呢啲乾花首飾，與人分享幸福嘅感覺。」
