關心妍操fit開騷 老公陪節食
五年前下嫁金融才俊楊長智、進身幸福人妻的歌手關心妍，並未有因身份改變而放棄音樂夢，有老公全方位支持的她更愈戰愈勇！月尾開騷的她近日正努力Keep fit，準備挑戰性感底線！
近日為演唱會日夜排練的歌手關心妍（Jade），身形fit爆但仍謙稱未達標：「仲差兩磅，目標係97磅！當你喺台上就要瘦啲，出到嚟先係fit。依家跑步每日45分鐘，仲會做兩三個鐘Gym。食嘢都要控制！」不過身為幸福人妻的她有老公楊長智陪節食：「佢夜晚嗰餐會同我一齊節食，例如我食沙律佢都焗住要食沙律，如果整得多嘢佢又驚我忍唔到口！所以可能佢都瘦咗嘅！」
御准性感怕醜
結婚五年一直與老公恩愛如昔的Jade，大方分享相處心得：「男人係唔好煩佢囉，有啲嘢你提咗一次就OK喇！同埋我唔會check佢囉，我覺得畀好多自由度佢係relationship最緊要嘅！」今次開騷揚言會性感上陣晒線的Jade，早獲老公御准：「佢喺美國長大，Deep V唔會覺得有問題，有時係我自己怕醜！」
演繹新舊金曲
性感賣大包外，身為實力派歌手的Jade當然會演繹多首新舊經典金曲。至今已入行12年，Jade的音樂路上有堅持亦有妥協：「好多時我哋理想化，但係未必真係可以實現，新歌《逆來順受》表面講愛情但對我嚟講係音樂路上嘅心聲。唱歌一路都係我嘅夢想！我唔會因為身份唔同咗而夢想有變！可能大家覺得人生到咗某一個階段係要做另一啲嘅嘢，例如生仔咁，但係我唔會放棄我嘅專長。」更揚言會一直唱下去！
髮型：Sev@Hair Culture
化妝：Cyrus Lee
場地：九龍帝京酒店
服裝：Germain
文：專案組
攝：嚴偉國