龍劍笙台上太多情 用盡quota
粵劇名伶任劍輝今年離世25周年，入室弟子龍劍笙在電台訪問中憶起恩師時仍不禁數度落淚。明天將過七十大壽的她又笑言至今仍孑然一身，全因自己在台板上太多情，將戀愛運都花光了。
師承名伶任劍輝及白雪仙的龍劍笙（阿刨），昨日在電台錄音訪問中大談自己的粵劇生涯，雖然其恩師任姐已離世25年，但每當提起任姐時，阿刨就忍不住落淚，她坦言任姐的離世對她打擊甚大：「就算咁多年我都放唔低，佢真係對我好好，每刻我都好掛住佢。」她又指當年因走不出傷痛才會退出舞台：「初初以為努力演出可以報答佢，以為時間可以沖淡，但原來唔得。個心愈來愈空，驚有一日出台會空白一片，唔想失禮師傅，所以要休息。」
她指仙姐也支持其決定，但仍對劇團感抱歉：「要休息我都好唔好意思，我有同仙姐傾過，佢話真係覺得唔可以演出嘅話，都冇得勉強。」當然阿刨亦曾和舊拍檔梅雪詩商量，但認為天下無不散之筵席。
70大壽淡然處之
阿刨16歲開始學藝，為粵劇奉獻，明天將70歲的她依然孑然一身，坦言從未談過戀愛，更打趣說：「台上談晒喇，冇喇，上天有配額，你做咁多多情公子，一日撩咁多女仔，台下冇晒喇。」但她指未覺遺憾：「細個時又細個，大咗就覺得自己夠大冇人要。呢啲嘢唔到你恨，緣分到咪到，我又未恨過喎。有得就有失，我依家好滿足、感恩。」她對70大壽淡然處之：「冇咩感覺喎，我唔覺得自己咁大年紀，仲好似初初入行！」
文：音樂組