鄭俊弘攬實姜麗文 愛火重燃
「星夢幫」的鄭俊弘（Fred）前晚舉行處男個唱，獲多位緋聞女友包括姜麗文、蔡思貝和王君馨捧場打氣，當中最矚目是傳聞已分手的姜麗文不避嫌帶同哥哥姜文杰及爸爸秦沛撐場，Fred更在演唱會中段落台與姜麗文肉緊擁抱，「阿爸」秦沛更親吻Fred臉頰，惹來Fred與姜麗文翻撻之嫌！
鄭俊弘（Fred）前晚在九展舉行處男演唱會《鄭俊弘WELCOME TO MY DREAMS演唱會2014》，已傳分手的姜麗文、緋聞女友王君馨及蔡思貝到場支持，姜麗文又帶同哥哥姜文杰及父親秦沛撐場，而Fred母親、婆婆及舅父、好友鍾嘉欣、無綫高層樂易玲都有睇騷。同屬星夢娛樂的藝人吳若希、林師傑、胡鴻鈞和姚兵則任表演嘉賓。
講婆婆頓變喊包
Fred邊彈結他邊唱歌打頭陣，在台上脫下外套騷結實老鼠仔，他表示今年做了很多新嘗試，包括擁有自己的專輯及開了屬於自己的第一場音樂會，更有機會拍廣告。之後Fred換上棗紅色西裝，答謝婆婆湊大自己時不禁淚灑舞台，慘變喊包。
Fred又落台與歌迷握手，期間有瘋狂歌迷強吻Fred，場面相當尷尬。當Fred行到前緋聞女友姜麗文的座位時，他毫無避忌與她「世紀擁抱」，在旁的秦沛更親了他的臉頰，看到Fred與姜麗文對望的眼神，看似餘情未了，而Fred當着所有緋聞女友面前擁抱姜麗文，似乎力證她地位超然，引來翻撻之嫌！
叫秦沛做「阿爸」
至演唱會尾段，Fred獲唱片公司CEO何哲圖、無綫高層樂易玲及Fred媽咪送上生日蛋糕，預祝他31歲生日。樂小姐開口力撐Fred：「夢想成真，你係屬於舞台！」當Fred吹蠟燭許願時，他細細聲說：「紅館見！」Fred受訪時提到幾位緋聞女友都來撐場，他表示感謝所有人來支持自己。
談到「外父」秦沛都有到場，Fred卻稱對方為「阿爸」，表示已視對方為半個阿爸：「我平時係咁叫佢，好多謝佢抽空嚟。（公開戀情？）全部都係朋友，猶如屋企人啦，阿爸好鼓勵我好錫我，冇咗佢鼓勵嘅說話可能我都放棄咗。」
文：音樂組