黃又南咬緊牙關還父債
組合Shine成員黃又南父親於2003年因生意失敗欠下700萬巨債，由又南一力承擔，至2009年才還清。他接受電話訪問時坦言當時感到無比壓力：「還咗一兩個月已經有朋友同我講冇必要孭條數，但我都選擇盡力去還。當時真係勁困擾，唔單只唔可以亂使錢，連女朋友都冇時間陪，最後搞到分手，但我都要咬緊牙關捱過去。」
另外，昨日生日的黃又南與拍檔徐天佑前晚開派對慶祝，又南稱：「近排經濟壓力好番啲，所以搞party慶祝。」問到會否獎勵自己？他坦言：「想換手機。（冇諗住換車？）想買樓改善生活多啲。」