容祖兒拒代父找數
在單親家庭長大的容祖兒由媽媽一手湊大，雖然與父親容錦輝感情並非深厚，但祖兒多年來經常孭起「父」資產，代父還債。近日容爸爸再被人貼大字報追債，祖兒最終在別無他選下與父親劃清界線。
樂壇天后容祖兒十五歲時父母離異，自此與媽媽相依為命，是圈中出名的孝順女。雖然她與爸爸容錦輝緣薄，但多年來一直做盡女兒責任，不惜做「大水喉」為容父多次揼水。在2000年，容父被爆向保險公司借糧7萬元後失蹤，遭入稟追債，當時仍是新人的祖兒仍出錢替父還債。
心事重重約母歎茶
其後，祖兒曾打本給父親做成衣批發生意，可惜最後執笠收場。近年容父轉戰內地開夜店，不過日前被人貼街招追數，再次捲入負債風波，最終祖兒在無可奈何下與父親劃清界線，拒再孭起「父」資產。其經理人霍汶希透過電話回覆：「其實祖兒兩姊弟一直由媽咪獨力撫養成人，祖兒係個孝順女，過去盡晒自己做女嘅責任。為咗保護屋企同媽咪，以後關於爹哋嘅事都同祖兒無關，唔會再作出回應，亦唔會負責任。」
受家事困擾的祖兒昨日趁假期與媽媽到灣仔歎茶，約在下午四時半，兩母女兵分兩路離開，戴帽及黑超的祖兒單拖在餐廳門口等待代客泊車時，強顏歡笑企定影相，似乎仍心事重重，最後自行駕駛座駕閃人。另外，祖兒前晚與王力宏、曹格等人出席東莞巨星演唱會，王力宏就跪地嘶吼，全場high爆。至於穿上白色女神裝的祖兒大晒歌喉，未有受家事而影響演出。
法律上不需負責任
另外，黃國桐律師指祖兒在法律上不需要代父還債，他說：「佢根本係唔需要負責任，除非佢簽咗文件，如果唔係佢根本唔需要還錢，因為係唔關佢事。」他又指祖兒若受騷擾，不需要向法庭發出禁制令保護自己：「其實都唔使，佢報警就可以，警方就可以保護到佢。（點先可以避免？）唯一做就只可以報警。」
文：音樂組
攝：追蹤組