羅力威不滿入死角：下次唔出席！
歌手羅力威出道以來一向不善辭令，他昨日與眾歌手出席《新城勁爆頒獎禮2014記者會》時獲安排坐第一排的「死角位」，一上台就全程黑面，事後威威受訪時表示不開心，因坐在角落頭，視線又被阻，更揚言：「如果頒獎禮當日只係坐角落頭位，下次不如唔好出席！」威威的緋聞女友雨僑和師兄洪卓立則認為這是威威的「正常表現」。
羅力威昨日與近60歌手單位出席新城勁爆記招，除了張敬軒、許志安、謝安琪、衞蘭、吳雨霏等一線歌手在後台等出場，其他歌手一如往常獲安排坐在台前搞氣氛助聲勢。不過，坐正頭排單邊位的羅力威就全程黑面，他與鄭欣宜及小肥上台選心水新人時明顯心不在焉，不時擔天望地。威威本來坐欣宜隔籬，但他落台後情願玩罰企，尾聲全場歌手大合照，威威又不主動搶有利位置，幾乎被淹沒在人堆中。
雨僑稱正常
威威事後受訪時不吐不快：「自己好怕悶又坐唔定，頭先坐喺度三、四個字好唔舒服，可能我坐角落頭位，可能輩分問題，角落又堆埋4、50個工作人員，遮晒視線，所以我今日係唔開心，直情唔係有啲被冷落，係被遮住晒！」他續說：「逼到撞到膝頭，又踩到我對鞋，如果着白鞋實花晒。」問威威是否不滿座位安排？威威語出驚人說：「如果頒獎禮當日只係坐角落頭位，下次不如唔好出席！」
對於威威因不滿坐死角發老脾，其緋聞女友雨僑和師兄洪卓立昨日都同場，他們都說這是威威「正常表現」，雨僑稱她坐在羅力威後一行較中間位，問可感威威不開心？她謂：「唔知喎，現場太多人，又唔覺佢黑面。（佢話唔出席頒獎禮，怕唔怕得罪電台？）佢性格係咁，好正常！」
問洪卓立可感威威不開心？他笑謂：「有乜問題？佢平時都係咁嘅樣，係正常樣，不嬲唔笑。（安慰佢？）唔得閒理佢，好多嘢做。」對於威威說不出席頒獎禮，洪卓立笑威威是「發脾氣仔」，是藝術家個性。
霍汶希開導
坐在威威隔一個位的小肥則說視線沒受阻，他指威威一向很Cool，問可試過不滿座位？小肥謂：「冇發生過喺我身上，可能我資歷漸長，個位愈嚟愈好。」
至於新城知訊台台長（音樂及娛樂）朱明銳坦言安排威威坐第一行已很尊重，記招後都有和他握手，對方當時沒任何投訴。而威威經理人霍汶希坦言威威一向小朋友，會和他傾下，給他多些正能量。
Profile 新一代師奶殺手
羅力威（Adason）
出生日期：1986年6月9日（28歲）
身高：1米73
學歷：中二赴新西蘭留學，在奧克蘭就讀至高中畢業
威水史：2009年參加第一屆《亞洲星光大道》奪得冠軍而正式入行，其後與亞視簽約。2012年加盟英皇做創作歌手，出道以來受到不少師奶粉絲萬千寵愛，更被冠以新一代「師奶殺手」封號。
文：音樂組