吳雨霏蛻變 翻撻等閃婚

經歷十二年娛樂圈洗禮,吳雨霏(Kary)由「大鼻妹」搖身一變成為「情歌女」,憑多首大Hit情歌兩度登上紅館舞台,Kary成功之道全賴「厚多士」,自認「多事妹」的她為了解每項工作都問到篤,事業如日中天的她愛情上亦有着落,兜兜轉轉與舊愛網球王子洪立熙翻撻成功,Kary更甜蜜承認男友有意與她拉埋天窗!Kary與型男余文樂分手後一度稱要專心工作,如今Kary雖只跟洪立熙翻撻數月,但已揚言做定閃婚準備,身心也「蛻變」的她,果然「緣」來沒法擋。

「星味」無法擋

相比剛入行的青春活力look,Kary近年在形象上轉變極大,fit爆的她頻頻露小蠻腰示人,就連夜蒲也以開窿露黑Bra帶出擊,難怪吸引不少男士上前搭訕!形象百變的她同時樣貌也省鏡起來,俗語有話「人紅自然靚」,Kary於組合Cookies年代憑「大鼻」成為標記,更慘被封「大鼻妹」,直至單飛發展後,其樣子及衣着打扮愈見「星味」,難怪連型男余文樂都「嗒糖」。可惜,Kary被連番指「整容」變靚,她一臉無奈說:「真係好少理會傳聞,同埋都回應咗一次,唔想成日去講,真心想大家將焦點放喺工作上。」

非刻意賣弄性感

Kary近年常以性感look示人,她說:「絕對唔係刻意賣弄性感,每次着衫都係睇場合,同埋鍾意試同玩新嘢。」造型及思想轉變極大的她說:「出道嗰時得15、16歲好少女,坦白講自己着乜又唔識,鍾意咩又唔識,嗰時對fashion毫無知識,直到組合Ping Pung先着我第一對高踭鞋,之後先多啲留意fashion。」

公開舊情復熾經過

去年宣布與余文樂分手的Kary寄情工作,近日閉關為新專輯錄音的她被爆與網球王子洪立熙(Brian)翻撻,Kary大方透露舊情復熾經過,她說:「因為呢排開始返教會,佢都係返同一個教會,所以成日見到,之後就開始有聯絡,大家喺番埋一齊都好順其自然。」問到是否視對方為結婚對象?Kary直認說:「係o架,睇時機同順其自然啦。」並爆男方有結婚念頭。問到會否閃婚?Kary哈哈大笑說:「有呢個準備,會好好計劃。」

鴛鴦戲水見家長

Kary出道即搭上青梅竹馬的Brian,由於雙方家長早已認識,故兩人不時帶對方返家食飯兼見家長,亦多次被拍到拍拖放狗,甚至Brian跟Kary及未來外父外母旅行,一對小情人更在長輩前於泳池鴛鴦戲水,可見Brian早已融入吳家,關係如一家人般親厚,今次兩人翻撻,希望可以開花結果步入教堂。

採訪:音樂組

攝影:張福宏

化妝:Hubei Har@Atelier d'Arris

髮型:Jimmy Chan@Hair Culture

服裝:NM Paris