王宗堯裸跑 襪冚何B仔
王宗堯為新戲街頭赤足裸奔，「股」起勇氣震Pat Pat，一再挑戰自己底線！笠上肉色襪仔保護「小宗堯」的他大呻侷促似戴「套」之餘，還自爆未向父母自首除褲通街走，實行以全身豁出去，認真沙膽！
藝人王宗堯昨日在薄扶林為新戲《壹獄壹世界》拍攝裸跑戲，在斜路上只用短褲遮住重要部位，赤腳跑近十次的他就算聽到劇組嗌Cut都煞唔切掣，搞到Pat Pat震震吓。他坦言自己今次是「股」起勇氣：「之前拍床戲又好，或者意識比較大膽嘅戲都係有着褲，拍嗰時遮遮掩掩。今次係自己公司嘅戲，咪留番啲好嘢畀自己公司，豁出去。」
問事前有何準備？他笑言要有心理準備，最後也只笠上襪仔保護「小宗堯」：「個感覺似戴避孕套，將所有嘢塞晒落去，其實幾難過，比起唔做保護措施更加局促。」又坦言未向父母交代拍裸跑戲：「佢哋知我好忙，但唔知我拍緊乜嘢，多數都係新聞先睇到，我諗聽朝（今朝）佢就睇到。（怕被鬧？）唔怕！外國啲戲都係咁，意識係大膽，但其實唔係睇到好多嘢。」
蕭定一：係犯行為不檢
雖然電影打算以IIB級上映為取向，但之後都有意識大膽的場口，包括性愛場面，王宗堯對此說：「都唔會露咁多o架喇。」問有否男男場面？他笑謂：「沖涼就有，執番梘可能會有，但男男就留番下套戲先！」
同場的「向西仔」張建聲也赤裸上身晒肥膏，現時約重195磅的他直言目標是增磅至200磅。有相熟營養師幫手增肥的他指拍攝完成後會積極減肥，希望用三個月時間減到得140磅。
至於這個公眾場合裸露場口，有行為不檢之嫌，電影投資者蕭定一說：「嚴格嚟講係犯咗行為不檢條例，我哋冇申請，博o架啫。為部戲效果，冇辦法啦！」
文：影視組