陳茵媺晒恩愛 奉夫為王
有指大肚婆旺氣盛，懷有第二胎的陳茵媺雖然鬼妹仔性格，原來骨子裏也迷信。昨日趁着出席馬場活動時，得悉佗B運氣旺，立即問記者有否買馬貼士！另外，老公離唔開口唇邊的她，冧爆指陳豪是她的「King」，認真恩愛！
無綫藝人陳茵媺、黃心穎、黃浩然等昨日現身馬場出席第三屆「東方表行沙田錦標」賽馬活動，同場有巨星甄子丹夫婦和產後首次露面的汪圓圓。懷着第二胎的茵媺身穿低胸裝露事業線，表示腹中BB已四個半月大：「比第一胎大得快，依家已經係第一胎六個月大嘅size。（仔定女？）未知。」她希望第二胎同樣順產：「生嘅過程係感到痛，但想同小朋友關係親密啲，同另一半有special born同special time。」記者指孕婦旺氣盛，問她可有投注買馬？她說：「係咩？我一陣買，有冇貼士分享？」
泊車問題小誤會
談到有報道指泊車阻到鄰居，她表示：「好愕然，覺得佢好nice，新年特登過嚟畀利是BB。而我哋一向泊喺私人地方，唔會影響人，我想大家住得和諧。（考慮搬走？）哈哈，係小誤會，見到會打招呼。」對於老公陳豪被稱「比華利山大王」，她大晒恩愛：「He is my king！」另外，陳豪和茵媺前晚現身機場，問旅遊時有否買BB用品，買粉紅色還是粉藍色？陳豪打趣道：「係買彩虹色。」
黃浩然食兩嘜米
而黃浩然透露「貝塞特氏症」病情已康復得七七八八，精神奕奕表示：「已經肥番，第一餐我食咗兩『嘜』米！我阿媽都呆咗！（藥物影響致肥胖？）唔係，休息多咗，狀態同體力差唔多復原，可以跑番步。」
文：名人組