劉中擎來自法國 華姐封后
長隆旅遊特約之「2014中華小姐環球總決賽」已於前晚圓滿結束，由來自法國現年26歲的劉中擎奪冠，而亞季得主分別是來自上海的何文倩和江蘇佳麗楊雪，而是次選美不設泳裝環節，大家無緣欣賞佳麗的美好身段。
「2014中華小姐環球總決賽」前晚在珠海舉行完畢，今年以「海之呼喚」為主題，跟處身的海洋度假區主題甚為吻合，已晉身決賽的十位佳麗，前晚先後進行兩輪激烈的問答環節，以及合演一場勁歌熱舞，佳麗們分別穿着旗袍、晚裝及短裙等多款服飾出場，唯獨欠缺泳裝環節。在問答環節中，(9)才源遠被評判重提她早前投訴宣傳片一事，她面露尷尬之情，解釋因宣傳片過份集中她的父親身上，擔心已分居的母親不開心。而被評判們看好的(9)劉中擎和(1)何文倩，最後由來自法國的劉中擎奪冠勝出，現場歡呼聲不絕，可謂實至名歸，而何文倩雖屈居亞軍，仍掌聲不絕，季軍則由(11)楊雪奪得。
愛睇旗袍環節
特地前往當地擔任壓軸獻唱嘉賓的歌手蘇永康，當晚負腳傷上陣，問到冠軍佳麗需擁有甚麼條件？他表示除美貌及智慧外，還需多「才」多藝：「因為評判會問一啲好深入嘅問題，分正反兩方去答，例如一個橙好唔好食，明明你覺得好食，但分你做反方就要講其他嘢，所以好考臨場反應同說話能力，不過冠軍一定係令人Bling一聲嘅感覺。（鍾意睇咩環節？）旗袍，同鍾意睇問答環節，加上評判刁鑽問題，應該會幾好睇。」
爆婚事零貢獻
蘇永康隨後透露十二月的婚禮事宜已準備就緒，更表示功勞全歸女朋友：「佢頭先同我講連僅餘嘅餅都派埋啦，搞到我都好唔好意思，自己好似冇乜貢獻咁，不過咁先證明到我老婆嘅能力，（唔怕阻住佢扮靚咩？）我哋兩個每個星期都會一齊去做Facial（美容）o架，（婚禮上有冇驚喜畀女友？）未諗，（未諗到定諗到唔講住？）呢個咪即係好似橙個問題咁，答咩都唔係，到時話你知啦。」
文：名人組