星二代減壓有方

鄭欣宜

「我唔識陳開心，但知道香港人都有呢個（情緒）問題，遇到困難時要求助。我曾經講過事業低潮期嗰陣冇經理人及唱片公司支持，覺得好迷茫，仲諗過放棄演藝工作算喇。但係我真心鍾意唱歌、跳舞，好在喺我最困惑一刻有人同我講『你唔唱歌、跳舞好嘥喎！』，就係呢一句令我繼續堅持落去。（點樣紓緩壓力？）自己OK，愈大愈冇壓力，愈唔知醜同面皮厚！做運動亦係最佳減壓方法之一。」

趙雅芝、黃錦燊兒子黃愷傑：

「如果有日自己都喺星途上遇到挫折，我會自己搵個平衡，最緊要唔好同人比較，咁先會開心，因為呢個世界永遠有人好過你、叻過你，要識得自己放鬆。當然要有個目標，但亦唔好設得太高，如果唔係好易會覺得自己好失敗。（咁你依家有咩目標？）我其實都係啱啱今年7月先喺北京電影學院畢業，一步步嚟啦！希望可以拍多啲好電影畀大家睇！」

黃愷傑

王子涵

王晶女兒王子涵：

「聽到呢個消息都好惋惜！我入行以嚟冇乜壓力，因為發展尚算順利，爸爸都好支持我。」

王晶

徐頴堃

徐少強、雪梨女兒徐頴堃：

「作為星二代當然會有壓力，家人冇反對我做呢行，依家我喺有線做飲食節目主持，係想向司儀方面發展，加上我對飲食有興趣，所以唔係太大壓力。如果有壓力，都要靠自己去處理，仲要視為推動力。我同哥哥徐偉棟感情好好，大家都喺呢行發展，所以更加可以互相分享。」