湯告魯斯珊迪娜等時機拍拖

美國小報《國民詢問報》（National Enquirer）日前爆出靚佬湯與珊迪娜的好友撥行大葵扇，力谷近年失婚的二人撻着，爆料者透露現年52歲的靚佬湯於2009年的金球獎頒獎禮上認識比自己年輕兩年的珊迪娜，二人旋即擦出火花，當日更被拍到密密傾不停，又咬耳仔又冧笑，報道就指兩人當時礙於有家室，未想過婚姻會觸礁而未有進一步發展。

一樣鍾意湊仔

不過，珊迪娜的真人騷男星老公Jesse James翌年爆出偷食而鬧婚變，女方失婚後一直鮮有緋聞，雖曾傳對電影拍檔佐治古尼（George Clooney）有意思，但就未見撻着，古尼早前更已被人權律師Amal Alamuddin「私有化」。而靚佬湯前年亦與姬蒂賀姆絲（Kaite Holmes）離婚，兩人齊齊失婚，共同好友就認為風趣幽默的珊迪娜最適合靚佬湯再投入戀情，女方雖非科學教教徒，但二人同愛湊仔，又各自育有年幼的仔女Louis與蘇莉（Suri），事業上更各有成就不怕比較，難怪被好友視為天生一對！

忙新片難約會

另一方面，本月與《職業特工隊5》（Mission: Impossible 5）劇組穿梭摩洛哥、倫敦與維也納進行拍攝的靚佬湯近日未見蹤影，而珊迪娜月初就被拍到以金髮look，更獲養子探班現身美國新奧爾良為新片《Our Brand Is Crisis》開工，各有各忙，似乎難有時間約會！

文：外娛組