軒仔蝶變娛斌
歌手張敬軒闊別紅館四年半，昨晚再登大舞台，舉行一連三場的《LIVE IN PASSION HINS 張敬軒演唱會2014》，更獲老闆楊受成夫婦、霍汶希（Mani）、契爺陳鼎禮、「蜜友」關智斌、胡鴻鈞、薛凱琪、林欣彤、藍奕邦等撐場，可為星光熠熠！
感慨4年來經歷
軒仔先以一身全白西裝王子look打頭陣，膊頭位更有多隻蝴蝶陪襯。白色舞台中間亦布滿蝴蝶，為歌迷營造浪漫白蝴蝶之夜。軒仔站於一隻大蝴蝶上面，然後吊到半空，演唱一曲《櫻花樹下》，惹得全場歌迷尖叫連連。軒仔示意歌迷安靜謂：「多謝大家！我好開心，頭兩首歌冷落了另一邊觀眾，用個八月十五對住你哋唔係咁好。」談到已4年冇踏上紅館，軒仔感慨地說：「坦白講，4年呢個數字唔算好大，但喺呢行足以經歷好多嘢！之前同媽咪經過紅館，都唔知仲有冇機會再踏上，不過今日有機會，我一啲都唔緊張，只想快啲上台唱歌畀大家聽！」
Encore唱Leslie
軒仔笑言在場有老一輩的觀眾，如果大家想聽舊歌，都歡迎大家點唱，即時有歌迷大叫「Leslie！」軒仔立即回應：「張國榮？我冇練，不如encore先唱！」隨即一眾歌迷大叫：「Encore！」氹得軒仔心花怒放，仲大讚歌迷超抵錫！
文：音樂組