現年29歲的張致恒（Steven）曾翻撻舊愛鍾舒漫失敗兼被o靚模爆塵年性史，不過，隨着他近年修心養性做了「神的兒子」，戀情終有着落，與年長2歲的「香港珠寶小姐」季軍莊端兒（Xenia）譜出「姊弟戀」，Steven昨日在觀塘被撞破「Run」女望海談心，兩人嚇得三魂唔見七魄口窒窒。

經歷過與鍾舒漫的多番離合，Steven終有新發展，昨日下午四時多，一身跑步look的Steven與一名束馬尾的新歡在觀塘海濱長廊緩跑，之後兩人如情侶般坐在公園長櫈望海談心，Steven邊傾邊輕撫女友長髮，繼而更搭着女友膊頭又摸手臂，期間，兩人童心未泯玩搖搖板，相當Sweet。

當兩人忘形談心之際，記者現身求證兩人戀事，女方嚇得拔足而逃，Steven亦方寸大亂，搲頭掩口。問到是否拍拖？Steven尷尬的說：「啱啱先開始……（女友係咪圈外人？）一半半啦！」陪你跑步？Steven問非所答：「呢度風景好咪嚟呢度跑。（點樣識？）朋友介紹。（公司知唔知你拍拖？）知道。（結婚對象？）啱啱開始冇幾耐咋！」

Steven全程搲頭相當搞笑，講到女友嚇到走咗？Steven即周圍望搵女友兼口窒窒說：「佢唔係成日對鏡頭。」原來女友已跑到遠遠暗角等愛郎Steven。

事後，Steven在電話再次回應，談到其女友身材甚佳，Steven說：「乜講呢啲，我鍾意佢就算佢冇身材都鍾意。」之前七月至十月Steven在內地拍劇，二人只靠電話傳情。母親可有見過女友？Steven謂：「全家都見過，佢哋都OKo架。」他又補充：「我一向感情事好低調，係以前身邊人高調。」

講到只見Steven搭女友膊頭，表現得好「純情」，Steven笑言：「我哋好規矩，錫都返屋企啦！（咁即係錫咗？）係錫咗。（同居呢？）未，我哋分開住。」

原來Steven的新歡正是2013年珠寶小姐季軍莊端兒，記者致電給她，她被Steven的體貼細心而受吸引，而最加分是Steven還會為她下廚。講到Steven以前被嘲「花心」？她謂：「都係以前嘅事，我哋都唔係一開始就拍拖，都有相處過一段時間，都知道佢信主後改變咗好多，亦同報道講嘅為人唔一樣。」

姓名：莊端兒（Xenia）

出生日期：10月23日（31歲）

身高：1米70

三圍：32D、24、35

入行經過：入行前於珠寶公司擔任銷售及市場推廣，在2013年參加珠寶小姐比賽，並奪得季軍。及後因得到比賽導師兼模特兒何紫綸推薦，獲莊思敏羅致旗下及備受力捧。

文：音樂組