顏子菲認懶 簡單護膚

前亞姐顏子菲回復自由身後密密接job，工作日夜顛倒的她卻能保持膚質出眾。問她有何護膚心得？子菲自爆堅守「less is more」的法則：「我細個聽人話嗰種護膚品好用，就會加入我嘅護膚程序，但不斷狂加令皮膚負擔好重。依家就唔用加法，反而減到最基本嘅爽膚、精華同面霜三個步驟就搞掂，啱晒我呢啲懶人。」她又自爆沐浴後觀察皮膚狀態：「我沖涼後會畀皮膚休息三十分鐘，咩都唔搽，睇番當時皮膚狀態，用番針對緊繃或敏感問題嘅精華去應對。做藝人成日化妝，皮膚好唔穩定，不過我唔係醫生，解決唔到皮膚問題就會去搵幫手。」