林夏薇唔啱即彈敖嘉年有婚數
家庭觀念有別的林夏薇與敖嘉年，對愛情睇法也不一樣。於傳統家庭成長的夏薇，一向視父母為明燈，男友要先給雙親過目，遇上「彈鐘」即告分手，相當灑脫。反觀已有穩定女友的嘉年，早已成功過關登堂入室，被女友父母認可關係，揚言兩年內結婚，婚禮亦一切從簡，現時更為生B不設防，望生夠兩個收工。
笑出真友誼
敖：雖然有段時間同你係同一個經理人，但從來未見過，咁當然知你存在啦！真正認識就係拍《寒山潛龍》。
林：初初對你印象係知你好跑得，有次服裝間啲姐姐話你跑步返嚟，原來屋企冇帶鎖匙。
敖：我對你印象就係林峯個堂妹，拍之前都有睇你演過嘅劇，新人嚟講都OK，又係中央戲劇學院畢業，好聰明。雖然到開工之前都冇互動過，直至第一日外景，我拍拍吓聽到有把好大笑聲，後來發現你踎低補妝係咁笑。
林：因為聽到你嗰場戲唱到古靈精怪，真係忍唔住。
敖：知你係大笑姑婆之後，就發現原來你好好玩，每段對白不停咁唸。
林：我係會記晒自己劇本，有次你頂唔順就喺旁邊話「師傅我唔敢」，好似金剛箍咁。其實我鍾意背埋人哋嗰啲，唔想台詞影響到我，每次收劇本已經開始背。
否認男人頭
敖：雖然套劇喺八、九月拍好熱，但我哋成班人玩得好開心。
林：記得我哋仲組織咗一隊遊覽團，一齊玩同做運動。拍完之後覺得自己係女俠，見到壞人可以打佢，戲入面我成日拳打腳踢，現實生活我其實幾溫柔。
敖：係咩？根本就係真人騷，你本身個人開朗同粗魯，但我鍾意女仔有個平衡，唔可以太小鳥依人，太粗暴成日SM feel又唔得！
林：我唔係呀！幾時有？
敖：戲入面你又打、又踢、又扯耳仔、扯頭髮咩都齊，真實咁就唔得。好彩冇遇過呢啲女仔，去到咁誇張唔得，郁手郁腳唔得，我會慢慢疏遠，心諗對方唔知係咪鍾意男人？
林：我真係好淑女，唔係男人頭。我識得呵番人，又會照顧人，幾有母愛添。當然如果男友鍾意take care人，我都會迎合佢嘅。
敖：公司都冇人敢恰你。
林：以前同男友都少嗌交，如果我唔啱會認，如果佢唔啱都會嘈一陣，之後就冇事。
敖：男人點都要就女人，梗有一方要踏出第一步，除非真係好過分，但都會吞咗先。
林：我又唔會畀男仔食住，會講道理。
要過父母關
敖：有冇計劃生小朋友？我想生兩個，龍鳳胎就正，另一半唔使咁辛苦。依家都不設防，結婚係呢兩年嘅事，會喺外國註冊。女友係加拿大人，咩形式婚禮都冇咩特別要求，我就小康之家唔想咁鋪張，最重要係搵咗地方先，婚紗相都影咗。
林：我同邊個生？係有追求者，我嘅性格係接受閃婚，人與人之間遇到係緣分。前排唔使開工多啲時間同朋友一齊，依家開工又冇，睇吓有冇人堅持到啦！父母都冇催，只係叫唔好太遲，我廿七歲啫！不過要佢哋鍾意先，意見一致，以前試過佢哋唔鍾意就分手。
敖：我哋就冇咩太複雜，鍾意就得。咁你以前唔鍾意個男仔咩？
林：都鍾意，當時父母講完之後都堅持咗一段時間，後來就發現真係有個問題存在，最後就分手。我都幾信父母，佢哋人生經驗豐富，一定係想我好。
後記：嬌滴滴得人驚
別看夏薇嬌滴滴，原來惡起上嚟都幾得人驚！敖嘉年透露大隊於杭州拍攝時，趁有一日假期與夏薇等搭的士遊覽，沒料司機兜路，結果被夏薇鬧爆。敖嘉年謂：「個司機兇夏薇唔係當地人，點知夏薇就好大聲用純正國語話番佢，我哋邊夠佢嚟！」夏薇理直氣壯地稱：「我都係講道理，唔好恰我哋，有需要會出頭，講義氣嘛！」
林夏薇
化妝：Raymond Yip
髮型：Oscar @ Hair
敖嘉年
化妝：Philip @ Touch Up Hair
髮型：Lee @ Hair