Mandy Lieu風騷有人追
混血模特兒Mandy Lieu前晚出席活動時被問到感情事，雖說隨緣但就不諱言身邊不乏追求者，總之現況開心，又風騷笑言若名花有主會告知記者；成功進軍影壇的她又希望能拍多些戲。
Mandy Lieu前晚出席英國高級時裝品牌DAKS 120周年展覽揭幕暨慶祝酒會，同場嘉賓還有許志安。Mandy透露稍後將到上海參與拍攝電影《破風》：「啱啱接咗呢部電影，我唔係主要角色，係加插落去嘅，同彭于晏有感情戲，之前喺電影《太極》已經同佢合作過。（佢係男神，會唔會自薦同佢演親熱戲？）之前同佢kiss過啦！」
問到感情事，她說：「感情事隨緣，希望有多啲戲拍，多啲作品畀大家。」至於可有跟早前與她傳緋聞的周焯華（綽號洗米華）聯絡，Mandy說：「邊個呀？我同好多男士都有聯絡，唔講呢啲喇。（你哋之前一齊去紐約？）好舊嘅新聞喇，講啲新嘅啦。（依家有一打追求者？）冇一打咁多，落實咗話你知，總之依家係開心嘅，希望事事順利。」
許志安冷熱大兜亂
同場一身秋冬打扮的許志安笑言熱到發燒，他說：「入行已經知，夏天就拍雪山飛狐，冬天就着夏天衫拍嘢，都慣晒。最惡劣嘅一次係幫張衞健拍戲，喺橫店，嗰時係10月，我已經打晒底但都係唔夠，凍到講唔到嘢，要埋去炭爐度取暖。另一次係自己拍MV，喺加拿大，得零下30、40度，真係講唔到嘢，講到歪晒，返到香港要配音，我寧願好似依家咁熱都唔想好似嗰時咁凍。」他又透露近期勤於操fit自己：「我試過嗰時癲癲哋，唔係點食嘢但又做大量運動，大量排舞。我個人唔鍾意出醜，要操到自己最fit，咁就咩衫都着到。」
文：名人組