軒仔金咪迎個唱 封深水埗Beyonce
張敬軒前晚為下周五舉行的演唱會綵排，並出動了一支價值20多萬元、由廣告商贊助的「金咪」，而美國天后Beyonce亦有一支，軒仔被指升呢國際級，抵死的他即笑指自己是「深水埗Beyonce」。
張敬軒將於下周五（24號）起假紅館舉行一連三場的《LIVE IN PASSION HINS張敬軒演唱會2014》，前晚軒仔以一身黑Look出席綵排，手持金咪的他說： 支咪係廣告商喺德國整畀我，每個地區只得一個歌手用一種顏色，美國代表係Beyonce。（你地位同Beyonce睇齊？）唔係，我係『深水埗Beyonce』。」
三嘉賓助陣
談到演唱會，軒仔透露邀得三位神秘嘉賓助陣：「今次打友情牌同碌爆人情卡，三場都係呢三位嘉賓，成個騷係有故事性，唔係佢哋表演時我去換衫。」
軒仔續說，今次個唱是他自編自導自演，亦準備了場刊派給歌迷，對於個唱宣傳活動較少，軒仔承認說：「票房理想，加上呢輪又咁多事，有啲宣傳叫停咗。」至於有傳軒仔不續無綫歌星合約，他說：「我都唔知幾時約滿，要問番公司。」他又表示很獲無綫重視。
狂索彩色粉
另外，軒仔為配合個唱將推出新專輯《Morph》，日前他抱病上陣拍攝封套，為製造效果，工作人員要在軒仔面前撒彩色粉末，搞到軒仔喪吸，睇完效果的他謂：「索咁多粉都抵。」
採訪：音樂組