謝安琪做老闆 尖咀掃碟

歌手謝安琪(Kay)成立自家唱片公司後首次推出新碟,日前她以老闆娘身份與師弟組合goldEN「佔領尖咀」,突擊到尖沙咀唱片舖巡視「碟」務。Kay除了一口氣連掃12隻碟外,更甜爆多謝老公張繼聰一早仆住去幫襯!

謝安琪有份投資的唱片公司邁亞音樂成立後,首度推出個人大碟「KONTINUE」,Kay升呢做老闆後自然格外緊張這張結晶品,前晚孖住同期推出新碟的師弟組合goldEN,化身成「快閃黨」到尖沙咀唱片店巡視銷量。難得女神落區,引來半百粉絲蜂擁而至,火速成為「集郵」對象,其中一位粉絲因外形似足填詞人林夕,更被Kay封為「翻版夕爺」。

Kay與goldEN在店舖內客串做售貨員,落足嘴頭推銷新碟,為了鼓勵小師弟,Kay更一口氣狂掃goldEN一共12張唱片,自掏荷包埋單。接受訪問時,Kay搞Gag自封做「巡字輩」:「我哋今日三個係『巡沛』、『巡煌』同『巡舖』。其實都幾害羞,因為見到自己隻碟排好前會沾沾自喜,但萬一好後又會暗暗失落,好大壓力。」

新歌反應好

提到新碟在銷量榜排第一,她即向「頭號歌迷」老公張繼聰發表愛的宣言:「真係好多謝張繼聰,我出碟嗰朝,佢一個人自己揸車去買咗一隻返嚟,估唔到咁有心。點解係買得一隻呢?因為就好似送玫瑰花咁,送一支先代表對方將自己嘅全部送晒畀我!」至於goldEN表示得知新碟在各大音樂平台反應不俗,更不時收到朋友的小道消息:「好多朋友話搭的士、小巴都聽到我哋新歌,仲讚首歌唔錯。」

文:音樂組

化妝:Khaki Yan

髮型:Conney Lai@Queen's private i salon