何佩瑜o靚模成熟時
相信每個女仔也渴望談戀愛，沉醉於愛的世界中，每天也要與另一半黏在一起。沒想到年僅25歲的何佩瑜（Jeana），雖然戀愛經驗不多，但已看透世情，認為每次戀愛也是相識、熱戀、猜疑、嗌交到分手。基於太了解「流程」，同時亦因太沉迷失去很多，直至單身一段時間後終於醒覺，現階段的Jeana沒戀愛衝動，反而專心工作，揚言不介意為事業放棄愛情，看來這位o靚模已成熟了！
感覺愛情乏味
有邊個女仔唔想拍拖同畀男朋友錫？只不過經歷過幾段感情嘅我，慢慢睇化咗愛情，再加獨居後開始獨立，覺得拍拖離不開由零開始，識咗之後熱戀，然後冇咗你唔得，日日要黐住，食飯瞓覺都黐住，跟住慢慢知道大家太多嘢就會有拗撬，開始有少少悶就會搵朋友出街，但對方又會問點解有個女仔喺度，咁就會嗌交，一定係咁。
緣分到唔抗拒
我以前都算係黐身女友，一拍拖就同居，跳過好多步驟。20歲時戀愛大過天，拍拖期間都失去咗其他嘢，好似朋友咁，做嘢都冇咁集中，拍完嘢就會攞電話WhatsApp男友。依家冇拍拖，做嘢都冇掂個電話，當然拍拖亦有好處，就係處理感情戲時容易好多，以前試過記得呢種感覺就冇問題，唔同階段都試過，同前男友做得番朋友，因為全部係和平分開。到依家單身咗一排，都冇咩諗拍拖，不過有緣分都唔抗拒，我信緣分嚟係擋唔住。如果真係想要男友，係想佢咩都玩過晒，成熟型，大我10年最好。
初出道寸寸貢
係咪為事業棄愛情？我估唔到自己有女強人感覺，以前太專注拍拖，依家見到吳千語拍拖，畀人影多數都係食飯、行街，會浮番好多以前自己熱戀時嘅影子出嚟，我當然希望佢哋行好耐啦！以前拍拖都有壓力，同張柏文嗰時好啲，佢明白呢個圈係點，拍咗4年嗰個圍村男友就慘啲，屋企人有壓力畀佢，所以話拍拖係咪好煩？我現階段都唔憧憬啦，拍拖冇咩好拍，太明個程序係點，冇激情，我以為自己唔會結婚，但堪輿師傅又話我有個孝子，所以都係隨緣。
難抵壓力爆喊
記得出道時得20歲，每次出嚟畀人感覺都係寸寸貢，又同同期出寫真嘅o靚模許穎（Phoebe）針鋒相對。其實我唔識佢，只合作過一套戲。依家諗番就覺得當時好幼稚，因為開始時唔知個圈係點，唔識處理傳媒、經理人同藝人之間嘅關係。開頭觀眾唔係好鍾意我，我唔係走天使路線，所以就直接啲，唔使畀太多遐想人，但就好有壓力，記得嗰段時間一落的士返屋企，飯都唔食就返房喊幾個鐘，因為身邊人唔明白，全部嘢都係自己撐住。
開拓演員之路
喺呢個圈不經不覺幾年，處事方法成熟咗，有人諗住做幾年唔做，我就視演員係一世，之前演舞台劇仲好似打開咗道門。係咪脫離o靚模行列？依家確實接少咗模特兒工作，影相唔係好識擺甫士。以前行性感路線，我唔係好想，依家自己話事權多咗，外界對我反應好咗，都開心。
三個月零收入
以前外間誤解我好有侵略性、好是非，其實我完全唔係咁。媽咪會擔心我被攻擊，好在佢冇叫我唔好做。我入行前做過黃金銷售員，但完全唔得，3個月零收入，仲畀人sell番轉頭，所以我冇呢方面天分。
後記：迷失IFC
信佛多年的Jeana，原來於人生低潮時曾想過出家，皆因於其思想中，認為世事往往如是，人生也是不斷為賺錢而辛苦工作，她謂：「出家可以跳過咗欲念，一切都變得平靜。」
曾幾何時，Jeana亦試過用盡一年所賺的錢買名牌，每日出街也拎住幾大袋戰利品，不過現時回想，便覺得很傻，她稱：「依家都冇行街，一唔使做嘢就留喺屋企，唔知原來銅鑼灣開咗新商場，就連去IFC都會迷路。」
文：影視組
攝影：秦健輝
場地：Dream Cafe