藍奕邦犯賤 逼出真感情
歌手藍奕邦近半年來受到頸椎移位困擾，卻遇着他加盟新唱片公司，阿邦帶病上陣製作頭炮唱片，經歷人生最大考驗，慶幸遇上林夕操刀的神級之作《孔雀開屏》演繹人類的求偶本能。
阿邦加盟新藝寶後的首張唱片早前推出，對於銷量問題，阿邦坦言不會過於緊張，因已盡其所能去做，阿邦謂：「新碟嘅歌都係一手包辦，自己填詞就有四首，但因為頸椎移位引致神經線發炎，半年嚟對我係一個好大考驗，成日頭痛、耳鳴又鼻塞，最差嘅時候直情想放棄，完全冇心情去做嘢。」
銷量不及健康
阿邦坦言最記得第一日進錄音室，唱高音便頭痛，根本錄不到音，當時都不敢向老闆Duncan說，後來Duncan得悉他的苦況，反而關心他健康多於錄音進度，令他稍為放心。最終如何完成新碟製作？阿邦直言：「要死撐o架，都多謝身邊好多朋友支持，令我成功跨過呢個考驗，所以，新碟賣得好定差？年尾有冇獎攞？對我嚟講都唔及健康緊要。」
不過，阿邦對這張經歷考驗下的傑作大感滿意：「呢張碟啲歌真係好好，雖然我喺唔舒服狀態去唱，但反而好滿意今次唱嘅部分，人好犯賤，好精神就會用多咗技巧去修飾，但當唔喺狀態，好多技巧嘢做唔到，逼自己從心而發，最原始去唱，出嚟效果就最真。」
批評道德判官
阿邦更大讚林夕給他寫的新歌《孔雀開屏》，講很多人對性及桃色新聞都大驚小怪，又喜歡自命道德判官去審視一切，阿邦直言：「我同林夕都覺得，呢啲關大家咩事？大家當自己係聖人定係修女？每個人都有孔雀開屏時候，求偶係人類天性，關埋房門對住侶伴可以孔雀開屏，但出咗房門就去批評人哋。」阿邦希望憑歌寄意，喚醒一些人的審視態度。
攝：張福宏
場地：Coffee Studio
文：音樂組