單身已久的30歲靚女歌手Katy Perry日前客串做體育節目主持，突然自爆睇中大學美式足球員Trevor Knight，更唔介意對方細她10年，當眾發出愛的呼喚，可惜Trevor唔回應，請天后食檸檬！
日前現身大學校園美式足球日的Katy，為ESPN體育頻道節目客串做主持。紥起春麗頭的她悉心打扮，心情勁靚。當節目拍檔問她睇好哪隊贏比賽時，她話自己揀球員只睇個樣，然後當住全國電視觀眾面前大膽示愛：「Trevor，你聽到嗎？我一定會追求你的！」更高舉貼住Trevor照片的心心牌，又做出打電話手勢叫對方找她。
做完主持的Kate轉戰觀眾席。首次現場看美足賽的她，非常投入，拋開天后形象，又緊張到張口大叫，表情多多。當天Trevor所屬的俄克拉何馬州大學隊表現失準，慘敗給對手，莫非Katy腳頭差？而輸波的Trevor則未有回應天后的示愛。他被指本身已有在大學修讀化學工程的女友Kate Williams。
Katy近年事業大紅，緋聞亦不絕於耳。8月中，她就曾孖男星Riff Raff出席MTV頒獎禮，因而傳出緋聞。近期她又盛傳與DJ兼唱片監製Diplo約會，雖然未有正式承認拍拖，但她卻曾向記者透露只會愛上懂音樂的男士！
文：外娛組