阿佘60萬人仔見一面 中港爭峯
由「爆Seed」林峯、「釘姐」佘詩曼等主演的無綫劇集《使徒行者》，未到最後一分鐘都難分劇中角色是兵？還是賊？最終六位臥底的結局在上周五塵埃落定，回到現實中，六位「二五仔」齊齊殺出一條財路，「底」薪升到嘭嘭聲！自由身的林峯掀起新一輪中港挖角戰、阿佘商演酬勞衝破60萬人民幣，連配角沈震軒及高海寧（高Ling）亦財源滾滾來。這條臥底之路，可謂「錢」途無可限量！
剛在上周五播出大結局的《使徒行者》成功帶起煲劇話題，內地視頻網共錄得近12億點擊率，事關觀眾一邊追劇，一邊「搲」爆頭競猜誰是臥底，最終答案六大臥底是林峯、阿佘、高Ling、沈震軒、陳倩揚及終極臥底苗僑偉（三哥）。雖然劇集已播放完畢，但這股臥底餘波繼續蔓延，帶挈六位演員「臥底升城隍」！
內地劇大收叫好又叫座
最威水莫過於男主角林峯，除了憑「爆Seed」一角紅爆中港外，他主演的內地劇集《衛子夫》也叫好叫座，在雙線劇力谷下，早前離開娘家無綫的他再次成為各大經理人公司的搶手貨。據知，香港方面英皇有意出重金，內地方面則由華誼兄弟及保利博納爭崩頭，各方誠邀林峯加盟。林峯在內地劇酬金原已叫價50萬人民幣（約63萬）一集，現在身價更是有加無減！
至於女主角阿佘則靠商演騷密密吸金，據悉《使》劇出街後，她的酬勞三級起跳，由原本20萬人民幣（約25萬港幣），勁升至60萬（約75萬港幣）一場商演。阿佘昨日接受電話訪問時，承認工作量大增，將會展開珠江三角洲巡迴商演：「我自己唔係幾知幾錢，呢啲交畀公司處理，但都有聽人提過（加價），如果係真，當然好開心，嚟緊真係有幾多內地商演，包括上海、深圳等。」至於「卓Sir」三哥榮升廣告界寵兒，除了連任威利來洋酒代言人外，現階段更與多間廣告商斟洽中，包括高爾夫球場代言人。
高Ling沈震軒水漲船高
三位「一線臥底」均豬籠入水，在劇中沒有好下場的高Ling及沈震軒，在現實中反而水漲船高，食住「使徒效應」身價狂飆！沈震軒直言獲身邊朋友大讚演技，並因《使》劇而成功開拓內地市場：「嚟緊喺唔同地方都接咗商演，好忙、好開心！知道公司有調整價錢，都好好，都開心嘅。」高Ling則透過經理人回覆稱：「好感恩客戶一直都好錫佢，依家人氣真係高咗，聖誕、新年等黃金檔嘅工作已經落實好晒。（酬勞升幾倍？）唔好講錢啦，開心價啦！」
文：音樂組