王卓淇自覺夠筍 唔使釣金龜
Ball場向來是不少靚女結識公子哥兒釣金龜的地方，應屆港姐冠軍邵珮詩、亞軍王卓淇以及季軍何艷娟前晚結伴出席慈善晚宴時，卻表示不會趁機釣金龜，因覺得港姐本身經已是筍盤。
應屆港姐冠軍邵珮詩、亞軍王卓淇以及季軍何艷娟前晚齊齊出席「香港傳藝節‧仁濟慈善晚宴」，同場的嘉賓還有汪詩詩、鄺美雲、王敏德與太太馬詩慧等。三位港姐被問到可會趁機在場內釣金龜，王卓淇即說：「唔會，本身港姐已經係筍盤，唔需要再釣。」三人又異口同聲表示現時沒有追求者，但就有很多朋友，問到三人當選後是否沒人敢埋身追求，何艷娟說：「又唔會，大家識朋友都係睇性格多啲，鍾意我哋嘅人會鍾意我哋嘅性格，唔會睇名銜。（最近忙咩？）都係啲慈善工作。（想唔想拍劇？）想，想試多啲唔同嘅嘢，想試下演喜劇同古裝劇。」而卲珮詩就表示想演佗槍師姐這類角色：「或者好似我偶像佘詩曼演嘅《使徒行者》呢類劇集。」王卓淇則想做主持。
圓圓餵人奶瘦身
汪詩詩就與母親一同赴會，提到她初為人母的妹妹汪圓圓大派薑醋，詩詩表示也有幫忙準備薑醋，問到圓圓近況，詩詩說：「佢幾健康，依家坐緊月。（有無狂進補？）又無，都係由陪月安排。（BB大得好快？）我聽圓圓講話已經有兩套BB衫唔啱着，BB好長。（圓圓湊唔湊得掂BB？）佢哋兩個（圓圓和丈夫蔡加讚）好好，都無打嚟求救。（佢修身修成點？）無咁快，我嗰時都要6個月，佢餵人奶可能會瘦得快啲。（會唔會諗住生多個所以唔修身住？）我諗慢慢嚟，佢哋第一次做父母好緊張，令到我哋抱BB都好緊張。」同場還有本地時裝設計師丘雪祺的時裝騷，由名模Jocelyn、陳嘉容、湛琪清和Rosemary等演繹。
文：名人組