林欣彤送頭髮畀G.E.M.升空
女歌手林欣彤（Mag）前晚身穿短裙仔到海洋公園出席活動，與學生分享夢想，提到巨肺歌手G.E.M.有機會漫遊太空6分鐘，Mag坦言羨慕：「佢好勁呀！我由細到大睇咁多太空科幻片，都想試吓！我估G.E.M.係鐵肺，平時成日運動，太空人訓練應該難佢唔到。（有咩想託佢做？）剪條頭髮畀佢，叫佢喺太空揚出去，當自己去咗。」
提到將推出新碟，Mag表示唱片照有多個不同造型：「我最鍾意係開心Look，可以不停食嘢、跳繩，最難係性感，要我喺車外挨挨下，我都唔知點表現性感，要靠攝影師喇！條裙好難行又要着高踭鞋，影影下突然有曱甴添！嚇到我跳起！」