杜汶澤睇好陳靜不止花瓶
陳靜挾着o靚模之名出道，經過一番努力成功躍升大銀幕，更獲認同奪得金像獎最佳女配角，她直言有今日的成績，是要感激杜汶澤當日一席話令她啟發人生。杜汶澤則指她的成功，全在於她是一個有思想的女子，知道自己定位和存在價值所致。
陳：陳靜 杜：杜汶澤
復工狀態更好
陳：其實我拍咗嘅電影數量唔多，但好多部都係有份同你合作o架噃。
杜：有邊部無我呀，同你合作過三部電影。早排你休息咗一輪，閃電退出再復出，我覺得你喺邊度食咗啲聰明豆返嚟？喺《唐伯虎衝上雲霄》入面嘅NG次數急劇下降。好彩你只係NG數字下降，如果連三圍數字都下降就大件事。究竟你叉咗個咩電，裝咗個咩APPS咁厲害呢？
陳：叉咗個電係真嘅。休息咗三個月反省咗好多嘢，一返嚟開始工作就係拍《唐》片，第一場戲就要同你拍學生制服戲，仲要接吻同上床，好似動作場面咁。
首次合作狂NG
杜：同你拍《低俗喜劇》時第一場戲都係動作場面拍車震，我仲同彭浩翔講呢個女仔唔錯，技巧幾純熟，就算無對白都用身體動作配合到夠，第二日拍有對白就不停NG，記得嗰晚一頁紙對白拍咗好耐，原本趕住去婚宴，諗住由五點拍到七點去到仲有乳豬食，點知等你拍完，我趕到去紅豆沙都無得食。
陳：復出後真係順咗好多嘞，可能多咗經驗，自己信心大咗。可以再同你合作，講真大家默契係多咗，捉到你個節奏。初初同你合作好驚o架，要慢慢去適應和了解你。
杜：過往演出你都比較性感，今次同你合作《唐》片你就適量性感，不過你身材好都好難遮掩，依家你可以唔賣弄身材，因為你貴咗嘞，金像獎最佳女配角喎！
陳：唔好咁講，每套戲都有不同角色發揮，有不同崗位。
喊住被CUT線
杜：其實同你合作過咁多次，同你都叫做係朋友一場啦，私下都有聯絡食飯咁。當日你突然退出，我都無好狠咁鬧你，因為我擔心再鬧你，你飛咗落街，到時我真係唔知點算。
陳：當時我都知你唔係鬧我，係教我。我仲好記得你同我講娛樂圈工作，尤其拍電影係好講義氣嘅。
杜：我邊有資格鬧你呀，我只係覺得就算平時個人生活點都好，話咗要拍戲、要埋位，點都要到。拍電影牽涉好多人，你唔撈唔緊要，辭職咋嘛，但要交帶聲，你要走都拍埋先啦。但呢件事上無影響我哋兩個人關係，反而感情仲好咗添。
口才好 難招架
陳：我仲記得當時個情緒都仲係好唔穩定，不停喊住咁同你傾，喊到你一啲都聽唔到我講乜，你都費事理我Cut咗我線嘞。其實我好欣賞你嘅工作態度，真係好專業，呢個係你嘅優點。但你嘅缺點就係收工後全部出晒嚟，你會講好多說話令我招架唔到，但我反擊唔到，我真係好嬲你。
杜：小姐，咁你反擊唔到我係你個缺點，而唔係我個缺點噃。我覺得你個優點擺晒喺大家眼前，身材好好啦，缺點我覺得你做事比較感情啲。呢幾年娛樂圈湧現一大批o靚模，但可以做到電影明星仲拎埋金像獎，真係得你一個，你同周秀娜都可以咁成功，除咗你哋都係靚女，最重要係知道自己喺個圈度做緊乜，做事有自己思想。我接觸過有啲所謂o靚模，都唔知自己嚟開工做乜，冇責任心，態度唔好又冇禮貌，你唔發達唔緊要，唔好阻住其他人搵食。
陳：其實我覺得同你合作親都幾有運，私底下你會用呢一種特別方式去啟發我，令我做人處事和學習到好多嘢，係一個好好嘅前輩。
杜：唔好咁講，導演彭浩翔先係你恩人，我同你都係打工仔啫。
隨時合體出書
杜汶澤和陳靜來自不同年代的藝人，二人除了合拍原來還有共同嗜好，大家都喜歡食，杜汶澤笑說：「有年過年大家都一齊食團年飯，佢話佢係孤兒仔喎。其實陳靜係一個食家，去到邊食到邊，食親都好嘢。如果你唔做娛樂圈，不如出書講飲食啦。」陳靜則笑言杜汶澤對飲食更有研究，加上對方亦很喜歡旅行，又指他不做娛樂圈可以出旅遊書介紹世界各地。二人得知大家興趣相投後，相約一起推出飲食、旅遊書，杜汶澤說：「我哋就不如合併啦，出一本書有晒飲食同旅遊介紹，呢啲就係理想職業嘞。真係陰功，要四圍飛去旅行介紹畀讀者呀！呢份工都幾辛苦喎。」
唔介意行性感
陳：由出道至今，好多人都用「性感女星」嚟形容我，其實我真係冇乜所謂。依家好多人問我有冇後悔當日行呢條路，我可以話冇。喺生命出現過嘅都係我嘅一部分，每一個階段都係過程，我覺得依家成長咗，有啲經歷個人先會開心，我依家搵到一份喜歡的工作，唔好畀咁多框框自己，觀眾可以話係我哋嘅客人、消費者。
杜：嘩，好客之道點少得你。喺我立場，娛樂圈好似動物園，每種動物都有小朋友鍾意睇。最慘係你做開鱷魚好鬼受歡迎，走咗去扮馬騮，點知扮極都唔似，消費者見到扮馬騮嘅鱷魚又會唔開心，而馬騮見到都唔高興啦，每個人要知自己崗位。娛樂圈一定會有性感女星、會有丑角、反派，唔可以個個想做張曼玉就去做張曼玉嘛，唔可能一步登天。
文：影視組
場地：Metroplex星影滙
陳靜
化妝、髮型：Kayte Fung
服裝：SLY & Moussy
杜汶澤
化妝：小鬼
髮型：Ritz Lam @ Hair Corner